اسلام آباد : محمد رضوان کو ون ڈے ٹیم کی کپتانی سے ہٹاکر شاہین شاہ آفریدی کو ٹیم کی قیادت سونپنے کا فیصلہ کر لیا گیا ہے۔

اسلام آباد میں ہونے والے اجلاس میں شاہین شاہ آفریدی کو پاکستان ون ڈے ٹیم کی قیادت سونپنے کا فیصلہ کیا گیا۔ وہ جنوبی افریقہ کے خلاف تین ون ڈے انٹرنیشنل میچز میں ٹیم کی قیادت کریں گے۔

پاکستان اور جنوبی افریقہ کے درمیان تین ون ڈے میچز کی سیریز  4 سے 8 نومبر تک فیصل آباد کے اقبال اسٹیڈیم میں کھیلی جائے گی۔

اجلاس میں ہیڈ کوچ مائیک ہیسن، ڈائریکٹر ہائی پرفارمنس عاقب جاوید اور سلیکشن کمیٹی کے ارکان شریک ہوئے۔

لیفٹ آرم فاسٹ بولر شاہین شاہ آفریدی اب تک 66 ایک روزہ اور 92 ٹی ٹوئنٹی میچوں میں پاکستان کی نمائندگی کر چکے ہیں جن میں انہوں نے مجموعی طور پر 249 وکٹیں حاصل کیں، اس کے علاوہ وہ 32 ٹیسٹ میچوں میں 120 وکٹیں حاصل کر چکے ہیں۔

شاہین شاہ آفریدی نے اس سے قبل رواں سال کے اوائل میں نیوزی لینڈ کے خلاف پانچ میچوں کی ٹی ٹوئنٹی سیریز میں بھی پاکستان کی قیادت کی تھی۔تاہم، ان کو ناقص کارکردگی کی بنا پر کپتانی سے ہٹا دیا گیا تھا۔

خیال رہے کہ اس سے قبل محمد رضوان پاکستان کی ون ڈے ٹیم کی کپتانی کررہے تھے۔