ایمسٹرڈیم: نیدرلینڈ کے دارالحکومت ایمسٹرڈیم میں لاکھوں افراد نے فلسطینی عوام کے ساتھ اظہارِ یکجہتی کے لیے سڑکوں پر مارچ کیا۔

منتظمین کے مطابق مظاہرے میں تقریباً ڈھائی لاکھ سے زیادہ افراد شریک ہوئے جو سرخ لباس پہن کر نکلے اور اسے “ریڈ لائن مارچ” کا نام دیا گیا۔مظاہرین نے فلسطینی پرچم اٹھا رکھے تھے اور مختلف نعروں اور بینرز کے ذریعے اسرائیل کے خلاف احتجاج کرتے ہوئے غزہ میں فوری جنگ بندی اور انسانی حقوق کے احترام کا مطالبہ کیا۔

منتظمین کے مطابق اس مظاہرے نے ایمسٹرڈیم کی تقریباً 30 فیصد آبادی کو اکٹھا کر دیا جو فلسطینی عوام کے ساتھ یکجہتی کے لیے شانہ بشانہ کھڑے تھے۔ یہ نیدرلینڈ کی تاریخ کا سب سے بڑا پرو فلسطین احتجاج قرار دیا جا رہا ہے۔

شرکا نے نیدرلینڈ کی حکومت پر زور دیا کہ وہ غزہ میں انسانی ہمدردی کے اقدامات کی حمایت کرے، اسرائیلی کارروائیوں کے خلاف واضح مؤقف اختیار کرے اور فلسطینی عوام کے بنیادی حقوق کے تحفظ کے لیے عملی اقدامات اٹھائے۔

اس مظاہرے نے یورپ بھر میں جاری فلسطین سے یکجہتی تحریک کو مزید طاقت دی ہے اور نیدرلینڈ کی پالیسی پر دباؤ بڑھا دیا ہے۔