علامہ اقبال میڈیکل کالج اور جناح ہسپتال لاہور میں سالانہ انٹر پروفیشنل میڈیکل کانفرنس AIMSCon-2025 کا کامیاب انعقاد ہوا، جس میں پاکستان بھر سے طبی طلبہ، ماہرین، اساتذہ اور محققین کی بڑی تعداد نے شرکت کی۔

کانفرنس کی صدارت پرنسپل پروفیسر ڈاکٹر طیبہ وسیم نے کی، جبکہ پروفیسر ڈاکٹر شاہد سرور بطور مہتمم کانفرنس پیش پیش رہے۔

ان کے ہمراہ فیکلٹی کے دیگر سینئر پروفیسرز اور ماہرین نے بھی کانفرنس کے کامیاب انعقاد میں کلیدی کردار ادا کیا۔

کانفرنس میں 400 سے زائد تحقیقی مقالے پیش کیے گئے، جبکہ 700 سے زائد شرکاء نے بھرپور شرکت کی۔ اس موقع پر 24 تحقیقی مقالوں اور 100 بہترین پوسٹرز کو خصوصی انعامات سے نوازا گیا۔

پروفیسر ڈاکٹر طیبہ وسیم نے خطاب کرتے ہوئے کہا کہ تحقیقی سرگرمیوں سے طلبہ کی ساکھ بنتی ہے، طب کے شعبے میں نئی تحقیق وقت کی سب سے بڑی ضرورت ہے۔

کانفرنس کے دوران پروفیسر ڈاکٹر محمود شوکت نے کلیدی خطاب کیا، جب کہ پروفیسر ڈاکٹر مسعود صادق مہمانِ اعزازی کے طور پر شریک ہوئے۔

علاوہ ازیں پروفیسر ڈاکٹر مہوش عروج نے بھی علمی و بصیرت افروز گفتگو کی، جسے شرکاء نے بے حد سراہا۔

AIMSCon-2025 کی یہ تقریب تحقیقی سوچ، بین الشعبہ جاتی تعاون اور میڈیکل ایجوکیشن میں جدت کے فروغ کا عملی مظہر بنی، جسے علمی حلقوں میں بھرپور پذیرائی ملی۔