حج 2025 کے لیے پرائیویٹ اسکیم کے تحت بکنگ سست روی کا شکار ہے، جس کے باعث ہزاروں عازمین کے حج سے محروم رہ جانے کا خدشہ پیدا ہو گیا ہے۔

وزارت مذہبی امور اور بین المذاہب ہم آہنگی نے صورتِ حال کا نوٹس لیتے ہوئے پرائیویٹ حج آپریٹرز کو فوری طور پر بکنگ میں تیزی لانے کی ہدایت جاری کر دی ہے۔

وفاقی وزیر سردار محمد یوسف نے پرائیویٹ حج آپریٹرز سے ملاقات کے دوران ہدایت کی کہ آئندہ سات دنوں میں کم از کم 20 ہزار عازمین کی بکنگ مکمل کی جائے اور اس مقصد کے لیے عوامی آگاہی مہم بھی فوری طور پر شروع کی جائے۔

ذرائع کے مطابق پرائیویٹ حج آپریٹرز نے اب تک صرف 20 ہزار کے قریب بکنگ مکمل کی ہے، جب کہ بکنگ کی آخری تاریخ 17 اکتوبر ہے اور صرف 7 دن باقی رہ گئے ہیں۔

وزارت مذہبی امور پہلے ہی پرائیویٹ آپریٹرز کو تحریری ہدایت جاری کر چکی ہے۔

رواں سال پرائیویٹ حج کوٹہ کم کر کے 90 ہزار سے 60 ہزار کر دیا گیا ہے، جن میں سے 21,654 نشستیں ان عازمین کے لیے مختص ہیں جو گزشتہ برس حج سے محروم رہ گئے تھے۔ اس کے بعد پرائیویٹ آپریٹرز 38,346 عازمین کی بکنگ کے مجاز ہیں۔

ذرائع کے مطابق پرائیویٹ آپریٹرز نے 19 ستمبر سے حج بکنگ کا آغاز کیا تھا، مگر تاحال مطلوبہ رفتار حاصل نہیں ہو سکی۔ اگر یہی صورتِ حال برقرار رہی تو ہزاروں افراد کا فریضہ حج ادا کرنا ممکن نہیں ہو پائے گا۔

وزارت مذہبی امور نے اس اہم مذہبی فریضے کی بروقت ادائیگی کو یقینی بنانے کے لیے حج آپریٹرز سے قریبی رابطہ رکھنے اور بکنگ میں حائل رکاوٹوں کو فوری دور کرنے پر زور دیا ہے۔