پاکستان کرکٹ ٹیم کے کوچ اظہر محمود نے کہا ہے کہ جنوبی افریقہ کی ٹیم کا دورہ پاکستان خوش آئند ہے اور ان کے خلاف دو ٹیسٹ میچز پر ہماری مکمل توجہ ہے۔

انہوں نے کہا کہ ٹیم نے بھرپور تیاری کی ہے اور ٹیسٹ میچز جیتنے کے لیے 4 سے 5 دن تک مسلسل محنت درکار ہوتی ہے، اسی لیے ہمارا فوکس ہر میچ میں سیشن بائی سیشن برتری حاصل کرنے پر ہے۔

اظہر محمود کا کہنا تھا کہ ورلڈ ٹیسٹ چیمپیئن شپ کے اس اہم مرحلے میں ہمیں دیکھنا ہوگا کہ 20 اہم کھلاڑیوں کو کیسے آؤٹ کیا جائے۔ انہوں نے کہا کہ اگرچہ وکٹیں انگلینڈ اور ویسٹ انڈیز جیسی نہیں ہیں، مگر کچھ مماثلت ضرور موجود ہے۔

انہوں نے کہا کہ پاکستان اس بار 6 ٹیسٹ میچز کھیلے گا اور اس کے بعد بنگلہ دیش کے خلاف سیریز ہوگی، امید ہے کہ ہم اس مرتبہ بہتر کارکردگی پیش کریں گے۔

وکٹ کیپر کے حوالے سے سوال پر انہوں نے کہا کہ روحیل نذیر ایک اچھے کھلاڑی ہیں، تاہم رضوان مین وکٹ کیپر ہیں، اور ٹیسٹ میں رضوان کے بعد ہماری نظر روحیل پر ہے۔

جنوبی افریقی کھلاڑیوں کے خلاف حکمت عملی سے متعلق اظہر محمود نے کہا کہ کیمپ میں خاص طور پر ان کے مین پلیئرز کو کھیلنے کی پریکٹس کروائی گئی ہے۔

مایک ہیسن کی آمد پر سوال پر انہوں نے واضح کیا کہ مجھے کوئی اعتراض نہیں، وہ پاکستان کے ہیڈ کوچ ہیں، اور آگے ون ڈے سیریز ہے، وہ یہاں اپنی ان پٹ دینے آتے ہیں۔

آصف آفریدی کی سلیکشن پر ہونے والے اعتراضات پر اظہر محمود نے دفاع کرتے ہوئے کہا کہ آصف آفریدی ہمارے اسکواڈ کا حصہ ہیں، ان کی گزشتہ دو سال میں 80 وکٹیں ہیں۔ ہمیں تجربہ کار باؤلر کی ضرورت تھی اور آصف کا مستقبل روشن ہے۔

اظہر محمود نے واضح کیا کہ وہ اس وقت صرف ان دو ٹیسٹ میچز پر فوکس کر رہے ہیں اور آگے کیا ہوگا، یہ کہنا قبل از وقت ہوگا۔