مظفرآباد : آزاد جموں و کشمیر 8 اکتوبر 2005 کے المناک زلزلے کو آج 20 برس بیت گئے، آج شہدائے زلزلہ کی برسی عقیدت و احترام کے ساتھ منائی جارہی ہے۔

اس ہولناک سانحے میں مظفرآباد، وادی نیلم، باغ، بھمبر، کوٹلی، میرپور سمیت آزاد جموں و کشمیر کے متعدد اضلاع شدید متاثر ہوئے، جب کہ 8 بج کر 52 منٹ پر زمین لرز اُٹھی اور 87 ہزار سے زائد قیمتی جانیں ضائع ہوئیں۔

آزاد جموں و کشمیر بھر میں شہدائے زلزلہ کی برسی عقیدت و احترام کے ساتھ منائی جارہی ہے۔ دارالحکومت مظفرآباد میں مرکزی تقریب یونیورسٹی گراؤنڈ میں جاری ہے، جس میں وزرائے حکومت، چیف سیکرٹری آزاد کشمیر، پولیس اور ریسکیو 1122 کے افسران سمیت شہریوں کی بڑی تعداد شریک ہے۔

تقریب کا آغاز 8 بج کر 52 منٹ پر سائرن بجا کر کیا گیا، جس کے بعد شرکاء نے ایک منٹ کی خاموشی اختیار کی۔ وزرائے حکومت اور چیف سیکرٹری نے یادگارِ شہداء پر پھول چڑھائے، جب کہ پولیس اور ریسکیو 1122 کے دستوں نے سلامی پیش کی۔

اسی طرح وادی نیلم، باغ، اور دیگر اضلاع کے ہیڈکوارٹرز میں بھی دعائیہ تقریبات کا انعقاد کیا گیا، جہاں شہداء کے ایصالِ ثواب کے لیے قرآن خوانی اور دعا کی گئی۔