وزارتِ خزانہ کی جانب سے آئی ایم ایف کے فریم ورک کے تحت جاری کی گئی تازہ رپورٹ میں کہا گیا ہے کہ اگلے تین سالوں میں پاکستان کے ذمہ قرضوں کا تناسب 70.8 فیصد سے کم ہو کر 60.8 فیصد تک آنے کا امکان ہے۔

رپورٹ کے مطابق مالی سال 2026 سے 2028 کی درمیانی مدت میں قرضوں کی پائیداری برقرار رہنے کی توقع ہے، تاہم معاشی سست روی، شرح سود میں تبدیلی اور بیرونی جھٹکے قرض کے خطرات میں اضافہ کر سکتے ہیں۔

دستاویز میں بتایا گیا ہے کہ سال 2028 تک فنانسنگ کی ضروریات 18.1 فیصد کی بلند سطح پر برقرار رہیں گی۔

گزشتہ سال مارک اپ کی ادائیگیوں میں 888 ارب روپے کی نمایاں بچت ہوئی، تاہم وزارت خزانہ نے خبردار کیا ہے کہ فلوٹنگ ریٹ قرضوں کی بڑی مقدار کے باعث شرح سود کا خطرہ بلند رہے گا۔

رپورٹ کے مطابق پاکستان کے کل قرضوں کا 67.7 فیصد حصہ ملکی قرض پر مشتمل ہے جبکہ بیرونی قرضوں کا حصہ 32.3 فیصد ہے۔

ان میں سے 80 فیصد قرض فلوٹنگ ریٹ پر حاصل کیا گیا ہے، جس سے شرح سود میں اضافے کا خطرہ برقرار ہے۔

وزارت خزانہ نے رپورٹ میں واضح کیا ہے کہ کرنٹ اکاؤنٹ خسارہ بڑھنے، زرمبادلہ کے ذخائر میں کمی اور موسمیاتی تبدیلی جیسے عوامل قرضوں کے لیے خطرناک ثابت ہو سکتے ہیں۔ بیرونی قرضوں میں 41 فیصد فلوٹنگ ریٹ قرض شامل ہے، جو درمیانی سطح کے خطرے کی نشاندہی کرتا ہے۔

رپورٹ میں اس بات پر زور دیا گیا ہے کہ مالی نظم و ضبط، برآمدات میں اضافہ اور پائیدار معاشی اصلاحات ہی قرضوں کے بوجھ میں حقیقی کمی لا سکتی ہیں۔