کرکٹ کی دنیا میں مصنوعی ذہانت کا نیا باب کھل گیا، ویمنز ورلڈکپ کے دوران گوگل کے جدید اے آئی ٹول “جیمنائی” کا پہلی بار استعمال کیا گیا، جو کرکٹ میں ٹیکنالوجی کے بڑھتے ہوئے کردار کی ایک نمایاں مثال بن گیا ہے۔

بھارت اور سری لنکا کے درمیان ایونٹ کے افتتاحی میچ میں پریزنٹر اور سابق بھارتی کپتان متھالی راج نے گوگل جیمنائی سے میچ کی پچ کے بارے میں سوال کیا۔

جیمنائی نے جواب دیا کہ گوہاٹی کے اے سی اے اسٹیڈیم کی پچ بیٹنگ کے لیے سازگار ہے اور یہاں ہائی اسکورنگ میچ متوقع ہے، البتہ میچ کے دوران اسپنرز کو بھی مدد مل سکتی ہے۔

دلچسپ بات یہ ہے کہ جیمنائی کی پیشگوئی درست ثابت ہوئی۔ بارش کے باعث میچ 47 اوورز تک محدود ہوا، جس میں بھارت نے 8 وکٹوں پر 269 رنز بنائے، جبکہ سری لنکا کی ٹیم 211 رنز پر ڈھیر ہوگئی۔

یہ پہلا موقع ہے کہ کسی کرکٹ میگا ایونٹ میں مصنوعی ذہانت سے پچ ریڈنگ کے لیے براہِ راست مدد لی گئی، جو مستقبل میں کرکٹ تجزیے کے طریقہ کار کو مکمل طور پر بدل کر رکھ سکتی ہے۔