واشنگٹن: امریکی صدر ڈونلڈ ٹرمپ نے کہا ہے کہ چین میں بہت عجیب و غریب چیزیں ہورہی ہیں، چین کو دنیا کو یرغمال بنانے کی اجازت نہیں دی جائے گی۔

وائٹ ہاؤس میں میڈیا سے گفتگو کرتے ہوئے امریکی صدر نے کہا ہے کہ غزہ میں امن معاہدہ عرب ممالک اور اسرائیل سب کے لیے ایک شاندار اور تاریخی پیش رفت ہے۔ انہوں نے کہا کہ یہ صرف غزہ نہیں بلکہ پورے مشرقِ وسطیٰ کے لیے بہترین موقع ہے۔

ٹرمپ نے بتایا کہ یرغمالیوں کی واپسی پیر کو متوقع ہے، جبکہ اسرائیل اور عرب ممالک میں جنگ بندی کی خوشی میں جشن منایا جارہا ہے۔ ان کے مطابق انہیں اسرائیلی پارلیمنٹ سے خطاب کی دعوت ملی ہے اور وہ اپنے مشرقِ وسطیٰ کے دورے میں مصر بھی جائیں گے۔

امریکی صدر نے دعویٰ کیا کہ خام تیل کی قیمت جلد 2 ڈالر فی گیلن سے کم ہوجائے گی۔ ساتھ ہی انہوں نے چین پر اضافی محصولات عائد کرنے کی دھمکی دیتے ہوئے کہا کہ اگر بیجنگ نے نایاب معدنیات پر پابندیاں واپس نہ لیں تو اس ماہ کے آخر میں چینی صدر سے ملاقات منسوخ کرسکتے ہیں۔

ٹرمپ نے کہا کہ چین میں بہت عجیب و غریب چیزیں ہورہی ہیں اور بیجنگ انتہائی جارحانہ رویہ اختیار کر رہا ہے۔ انہوں نے خبردار کیا کہ نایاب دھاتوں پر پابندی کا اقدام عالمی منڈیوں کو جام کر سکتا ہے اور دنیا کے تقریباً ہر ملک کے لیے حالات مشکل بنا دے گا۔

انھوں نے کہا کہ چین کو دنیا کو یرغمال بنانے کی اجازت نہیں دی جائے گی، ٹرمپ نے مزید بتایا کہ ان کی جنوبی کوریا میں چینی صدر سے ملاقات طے تھی مگر اب وہ اس کی کوئی وجہ نہیں دیکھتے۔

نوبیل امن انعام کے حوالے سے ٹرمپ نے کہا کہ وہ فیصلے کا احترام کرتے ہیں مگر انعام نہ ملنے پر افسوس ہے۔ ان کے مطابق نوبیل انعام جیتنے والی ماریا کورینا ماچاڈو نے انہیں فون کر کے کہا کہ وہ یہ انعام ان کے اعزاز میں قبول کر رہی ہیں۔

ٹرمپ نے کہا، “شاید وہ چاہتی تھیں کہ انعام مجھے دیا جائے، مگر میں خوش ہوں کہ میں نے لاکھوں زندگیاں بچائیں۔”