صوبائی دارالحکومت پشاور سمیت خیبرپختونخوا کے مختلف اضلاع میں موسلا دھار بارش سے موسم خوشگوار ہو گیا، گرمی کا زور ٹوٹ گیا اور درجہ حرارت میں نمایاں کمی ریکارڈ کی گئی۔

محکمہ موسمیات کے مطابق پشاور شہر کا کم سے کم درجہ حرارت 20 ڈگری سینٹی گریڈ تک گر گیا۔

محکمہ موسمیات کا کہنا ہے کہ گزشتہ 24 گھنٹوں کے دوران چترال، دیر، سوات، بونیر، مالاکنڈ، باجوڑ، شانگلہ اور کوہستان سمیت بالائی علاقوں میں بارش ہوئی، جبکہ بٹگرام، تورغر، مانسہرہ، ایبٹ آباد، ہری پور، صوابی، چارسدہ اور پشاور کے میدانی علاقوں میں بھی بادل جم کر برسے۔

مزید برآں، نوشہرہ، مردان، مہمند، خیبر، کرم، اورکزئی، کوہاٹ اور ہنگو میں بھی بارش کا سلسلہ جاری رہا، جس سے موسم نہ صرف خوشگوار ہوا بلکہ کئی علاقوں میں خشک سالی کے خطرات بھی وقتی طور پر ٹل گئے۔

محکمہ موسمیات کے مطابق چراٹ میں سب سے زیادہ 50 ملی میٹر بارش ریکارڈ کی گئی، پاڑا چنار میں 34 ملی میٹر، دیر میں 23، پشاور شہر میں 16، اور پشاور ایئرپورٹ کے اطراف 20 ملی میٹر بارش ریکارڈ کی گئی۔

موسم کی یہ تبدیلی شہریوں کے لیے خوش آئند ثابت ہوئی ہے، جو گزشتہ کئی دنوں سے شدید گرمی اور حبس کا سامنا کر رہے تھے۔ محکمہ موسمیات نے آئندہ 24 گھنٹوں میں بھی بارش کا امکان ظاہر کیا ہے، جس سے درجہ حرارت مزید کم ہو سکتا ہے۔