پنجاب اور سندھ کی صوبائی حکومتوں کے درمیان لفظی کشیدگی شدت اختیار کرگئی، جس پر صدرِ مملکت آصف علی زرداری نے مداخلت کرتے ہوئے وزیر داخلہ محسن نقوی کو فوری طور پر کراچی طلب کر لیا ہے۔

ایوانِ صدر کے ذرائع کے مطابق صدر زرداری نے وزیر داخلہ کو ٹیلیفون کرکے پنجاب اور سندھ کے درمیان بڑھتے ہوئے تناؤ پر تفصیلی مشاورت کی۔

 انہوں نے زور دیا کہ اس کشیدہ صورتِ حال کو سیاسی بصیرت سے فوری طور پر حل کیا جائے تاکہ وفاقی اتحاد کو مزید نقصان نہ پہنچے۔

ذرائع کا کہنا ہے کہ صدر نے وزیر داخلہ کو ہدایت دی کہ وہ ذاتی طور پر کراچی آ کر سیاسی فریقین سے ملاقات کریں اور تنازع کے حل میں کردار ادا کریں۔

وزیر داخلہ محسن نقوی صدر مملکت آصف علی زرداری کی ہدایت پر کراچی پہنچ گئے ہیں، اب سے کچھ دیر قبل انہوں نے سندھ کے وزیر داخلہ  ضیا الحسن لنجار سے ان کی والدہ کے انتقال پر تعزیت کی۔

یاد رہے کہ گزشتہ چند روز سے وزیراعلیٰ پنجاب مریم نواز اور پیپلز پارٹی کے قائدین کے درمیان بیان بازی زور پکڑ چکی ہے۔

پیپلز پارٹی نے مریم نواز کے حالیہ بیان پر شدید ردعمل دیتے ہوئے قومی اسمبلی سے واک آؤٹ کیا اور مطالبہ کیا کہ ان کی قیادت کے خلاف دیے گئے بیانات پر معافی مانگی جائے۔

تاہم وزیراعلیٰ پنجاب نے اپنے موقف سے پیچھے ہٹنے سے انکار کرتے ہوئے کہا کہ اگر کوئی پنجاب کے خلاف بات کرے گا تو بطور وزیراعلیٰ میں خاموش نہیں رہوں گی۔

صوبے کے عوام کی عزت و وقار کا تحفظ میری اولین ذمہ داری ہے اور میں کسی سے معافی نہیں مانگوں گی۔

ادھر محاذ آرائی میں ایک نیا موڑ اس وقت آیا جب سندھ کے وزیر اطلاعات شرجیل میمن نے پنجاب کی وزیر اطلاعات عظمیٰ بخاری کو عوامی مباحثے کا چیلنج دے دیا۔

عظمیٰ بخاری نے یہ چیلنج قبول کرتے ہوئے طنزیہ انداز میں کہا کہ آپ 17 سالہ سندھ حکومت کے 17 منصوبے گنوا دیں پھر بات کریں۔

انہوں نے مزید کہا کہ آئیں لاہور میں آپ کو ترقی دکھاتی ہوں۔ چلیں بہاولپور، ملتان، ڈی جی خان اور جنوبی پنجاب کے دیگر اضلاع، پھر آپ مجھے سندھ لے چلیں اور دکھائیں کہ وہاں عوام کے لیے کیا کیا؟

سیاسی مباحثے کا رخ اب صرف بیانات تک محدود نہیں رہا بلکہ باقاعدہ چیلنجز اور جوابی حملوں تک پہنچ چکا ہے، جس سے وفاقی اتحاد کے اندرونی اختلافات کھل کر سامنے آ رہے ہیں۔