روسی وزارتِ خارجہ کی ترجمان ماریا زاخارووا نے افغان۔پاکستان سرحد پر 10 اور 11 اکتوبر کو پیش آنے والی تازہ جھڑپوں پر تشویش کا اظہار کیا ہے۔

ان کا کہنا ہے کہ کابل اور اسلام آباد نے سرحدی تصادم کی نوعیت اور اس کے اسباب کے بارے میں مختلف مؤقف پیش کیے ہیں۔

ترجمان کے مطابق دونوں جانب سے فضائی حملوں اور فائرنگ کے تبادلے کی اطلاعات موصول ہوئی ہیں جو سرحدی علاقے کے وسیع حصے، بشمول پشتون قبائلی پٹی، کو اپنی زد میں لے چکی ہیں۔

تازہ رپورٹوں کے مطابق اس تصادم میں دونوں ملکوں کے فوجی اہلکاروں کے جانی نقصان کی خبریں موصول ہوئی ہیں۔

تازہ اطلاعات کے مطابق، صورتحال اب بتدریج استحکام کی طرف بڑھ رہی ہے، اور ہم اس پیش رفت کا خیرمقدم کرتے ہیں۔

ہم کابل اور اسلام آباد سے تحمل و برداشت کا مظاہرہ کرنے اور تمام اختلافات کو سیاسی و سفارتی ذرائع سے حل کرنے کی اپیل کرتے ہیں۔

روسی وزارتِ خارجہ کی ترجمان ماریا زاخارووا  نے مزید کہا کہ ہمیں امید ہے کہ ہمارے دونوں دوست ممالک، افغانستان اور پاکستان کے درمیان انسدادِ دہشت گردی اور علاقائی سلامتی سے متعلق معاملات پر تعمیری مکالمہ جلد بحال ہوگا۔