پنجاب پولیس کارکردگی دکھانے کے چکر میں تمام ایس او پیز بھول گئی، اور پانچ سال قبل فوت ہونے والے شخص کے خلاف مقدمہ درج کرلیا ہے۔

بول نیوز کے مطابق جھنگ پولیس نے سنگین غفلت کا مظاہرہ کرتے ہوئے تھانہ گڑھ مہاراجہ میں ایک مرحوم شہری کے خلاف مقدمہ درج کرلیا، گرفتار ملزم کی اطلاع پر پولیس نے شاہ بہرام نامی شخص کے خلاف شادی میں آتش بازی کا مقدمہ درج کیا، حالانکہ وہ شہری پانچ سال قبل انتقال کرچکا تھا۔

ڈی پی او جھنگ کیپٹن (ر) بلال افتخار کیانی نے واقعے کا سخت نوٹس لیتے ہوئے فوری رپورٹ طلب کرلی اور تفتیشی افسر عمران انجم کو معطل کرکے چارج شیٹ جاری کر دی۔ ترجمان پولیس کے مطابق گرفتار ملزمان یوسف اور فریاد نے پولیس کو غلط معلومات فراہم کیں جس پر بغیر تحقیق کے مقدمہ درج کردیا گیا۔

ترجمان پولیس نے کہا کہ تفتیش کے دوران غلط اندراج سامنے آیا جسے ضمنی میں درست کردیا گیا ہے۔ ڈی پی او بلال افتخار کیانی نے واضح کیا کہ بغیر تصدیق مقدمہ درج کرنا ناقابل برداشت غفلت ہے اور پولیس فورس میں نظم و ضبط اولین ترجیح ہے۔