امریکی ناظم الامور نٹالی بیکر نے وزیر دفاع خواجہ محمد آصف سے ملاقات کی، جس میں باہمی دلچسپی کے امور اور دوطرفہ دفاعی تعاون کو مزید وسعت دینے پر تفصیلی تبادلہ خیال کیا گیا۔

وزیر دفاع خواجہ محمد آصف نے اس موقع پر کہا کہ پاکستان اور امریکہ کے تعلقات باہمی احترام اور مشترکہ مقاصد پر مبنی ہیں، جو کئی دہائیوں پر محیط ہیں۔

انہوں نے دونوں ممالک کے درمیان موجودہ دفاعی تعلقات پر اطمینان کا اظہار کیا اور اس بات پر زور دیا کہ دونوں ممالک کے تعلقات مضبوط تر ہوتے جا رہے ہیں۔

ملاقات میں پاکستان کے عالمی سطح پر ذمہ دار اور تعمیری کردار اور دونوں ممالک کے بڑھتے ہوئے تعاون کو سراہا گیا۔ دونوں فریقین نے افغانستان کی موجودہ صورتحال پر بھی تفصیل سے بات چیت کی۔

افغان سرزمین سے پیدا ہونے والے چیلنجز کا مؤثر انداز میں مقابلہ کرنے کی اہمیت پر بھی زور دیا گیا، تاکہ علاقائی امن و استحکام کو یقینی بنایا جا سکے۔

دونوں رہنماؤں نے ایک پرامن، مستحکم اور محفوظ افغانستان کے لیے مشترکہ کوششوں کی ضرورت پر اتفاق کیا۔

آخر میں دونوں فریقین نے اپنے دوطرفہ تعلقات اور تعاون کو متعدد شعبوں میں مزید وسعت دینے کے عزم کا اعادہ کیا۔