کراچی والوں کے لیے ایک اور اذیت کا آغاز ہونے والا ہے، یونیورسٹی روڈ پر ٹریفک کی روانی مزید متاثر ہوگی، کیونکہ کراچی واٹر اینڈ سیوریج سسٹم امپروومنٹ پروجیکٹ (کے ڈبلیو ایس ایس آئی پی) کے تحت اہم ترقیاتی کام شروع ہونے جا رہے ہیں۔

کے ڈبلیو ایس ایس آئی پی حکام کے مطابق نیپا چورنگی سے وفاقی اردو یونیورسٹی تک روڈ 10 نومبر سے لے کر 30 دسمبر تک بند رہے گا جس کی وجہ کے فور منصوبے کے تحت پانی کی نئی لائینوں کی تنصیب ہے۔

اس منصوبے کے پہلے مرحلے میں نیپا چورنگی سے وفاقی اردو یونیورسٹی تک 2.7 کلومیٹر تک پانی کی لائنوں کا نیٹ ورک بچھایا جائے گا۔

دوسرے مرحلے میں حسن اسکوائر سے نیپا چورنگی تک مزید کام کیا جائے گا۔ حکام نے بتایا کہ اس دوران 96 انچ اور 72 انچ کی لائینیں ڈالی جائیں گی تاکہ کراچی کے پانی کے مسائل کو حل کیا جا سکے۔

کے فور منصوبے کی تکمیل کی ڈیڈ لائن 30 دسمبر مقرر کی گئی ہے۔ تاہم، ترقیاتی کام کے دوران ٹریفک کی روانی میں شدید خلل پڑے گا، اور اس وجہ سے متبادل راستوں کے طور پر ٹریفک کو نیپا چورنگی سے الہ دین پارک کی طرف موڑا جائے گا۔