صدرِ مملکت آصف علی زرداری قطر کے دارالحکومت دوحا میں ہونے والی دوسری عالمی سماجی ترقیاتی کانفرنس میں پاکستان کی نمائندگی کریں گے۔

یہ اہم اجلاس اقوامِ متحدہ کی جنرل اسمبلی کے زیرِ اہتمام 4 تا 6 نومبر کو منعقد ہوگا، جس میں سماجی و اقتصادی ترقی سے متعلق عالمی حکمتِ عملیوں پر غور کیا جائے گا۔

صدرِ مملکت آصف علی زرداری آئندہ ہفتے قطر روانہ ہوں گے، جہاں وہ دوسری عالمی سماجی ترقیاتی کانفرنس میں شرکت کریں گے۔ یہ کانفرنس اقوامِ متحدہ کی جنرل اسمبلی کے تحت دوحہ میں 4 سے 6 نومبر تک منعقد ہوگی۔

ذرائع کے مطابق صدر آصف علی زرداری اپنے خطاب میں سماجی ترقی، روزگار کے مواقع کے فروغ، اور جامع معاشی نمو کے حوالے سے پاکستان کے عزم اور اقدامات کو اجاگر کریں گے۔

صدرِ مملکت اپنے خطاب میں بینظیر انکم سپورٹ پروگرام (BISP) کے کردار پر بھی روشنی ڈالیں گے، جس نے ملک میں غربت میں کمی، سماجی تحفظ کے فروغ اور کمزور طبقوں کے استحکام میں نمایاں کردار ادا کیا ہے۔

مزید برآں، صدر زرداری دوحہ الائنڈ سوشل پروٹیکشن اینڈ جابز کمپیکٹ (2026-28) کے آغاز کے لیے پاکستان کی تیاریوں پر بات کریں گے۔

یہ منصوبہ غیر رسمی شعبے کے کارکنوں، معذور افراد اور بچوں کے لیے سماجی تحفظ کے دائرے کو بڑھانے اور ماحول دوست روزگار کے فروغ سے متعلق ہے۔

صدرِ مملکت اپنی تقریر میں دوحہ پولیٹیکل ڈیکلریشن اور عالمی ترقیاتی اہداف (SDGs) کے ساتھ ہم آہنگ پاکستان کے منصوبوں کو نمایاں کریں گے، جبکہ وہ ترقیاتی شراکت داروں اور عالمی مالیاتی اداروں کے ساتھ قریبی تعاون کے عزم کا اعادہ بھی کریں گے۔

انہوں نے زور دیا کہ پاکستان ایس ڈی جی اسٹیمولس، قرض برائے سماجی و ماحولیاتی اصلاحات، اور چین کے گلوبل ڈیولپمنٹ انیشی ایٹو جیسے پلیٹ فارمز کے ذریعے مالی وسائل کے حصول پر خصوصی توجہ دے رہا ہے تاکہ پائیدار اور جامع ترقی کے اہداف حاصل کیے جا سکیں۔

صدرِ مملکت اس موقع پر عالمی اور علاقائی رہنماؤں، خصوصاً قطر کی قیادت اور اقوامِ متحدہ سمیت اہم بین الاقوامی تنظیموں کے سربراہان سے ملاقاتیں بھی کریں گے تاکہ مشترکہ ترقیاتی منصوبوں اور تعاون کے نئے امکانات پر تبادلہ خیال کیا جا سکے۔