کراچی: سندھ حکومت نے صوبے کے تمام تعلیمی بورڈز میں تعلیمی امور کو جدید اور آن لائن نظام میں منتقل کرنے کا فیصلہ کر لیا۔

ذرائع کے مطابق داخلوں، نتائج اور پرچوں کی چیکنگ کے لیے نیا آن لائن سسٹم متعارف کرایا جائے گا۔

اس مقصد کے لیے آن لائن انرولمنٹ اور ای مارکنگ سسٹم کی تیاری پر ایک چار رکنی کمیٹی قائم کی گئی ہے، جس کی سربراہی چیئرمین انٹر بورڈ کراچی کریں گے۔

کمیٹی آن لائن داخلوں، ای مارکنگ، نتائج کی ڈیجیٹل پروسیسنگ، سرٹیفکیٹس کی تصدیق اور ڈیٹا مینجمنٹ کے محفوظ نظام سے متعلق سفارشات مرتب کرے گی۔

ذرائع کے مطابق سندھ کے تمام تعلیمی بورڈز کو جدید ٹیکنالوجی کے استعمال اور امتحانی نظام میں شفافیت لانے کی ہدایت جاری کر دی گئی ہے۔