نیویارک سٹی : امریکا کے شہر نیویارک سٹی میں ہونے والی ریکارڈ توڑ بارش کے دوران دو افراد زیرِ زمین کمروں میں پھنس کر ہلاک ہوگئے۔

امریکی میڈیا کے مطابق ریکارڈ توڑ بارشوں سے پیدا ہونے والی سیلابی صورتحال کی وجہ سے شہر کے مختلف علاقوں میں سڑکیں، سب وے اسٹیشن اور مکانات زیرِ آب آگئے جبکہ نکاسیٔ آب کا نظام درہم برہم ہو گیا۔

پولیس کے مطابق پہلا واقعہ بروکلین کے فلیٹ بش علاقے میں پیش آیا، جہاں 564 کنگسٹن ایونیو پر ایک شخص اپنے کتے کو بچانے کے لیے زیر زمین کمرے میں واپس گیا لیکن پانی میں پھنس کر جان کی بازی ہار گیا۔

مقامی رہائشی رینی فلپس نے بتایا، ’’آج کا دن خوفناک تھا، پورا بلاک پانی میں ڈوب گیا۔‘‘

دوسرا واقعہ واشنگٹن ہائٹس، شمالی مین ہیٹن میں پیش آیا، جہاں 43 سالہ خوان کارلوس مونتویا ہرنینڈیز نامی شخص بوائلر روم میں پھنس کر بے ہوش ہو گیا۔

ریسکیو اہلکاروں نے موقع پر پہنچ کر اس کی لاش برآمد کی، ہرنینڈیز پانچ بچوں کا باپ تھا اور گزشتہ دس سال سے اسی عمارت کے بیسمنٹ میں مقیم تھا۔

محکمۂ موسمیات کے مطابق 20 منٹ کے اندر اندر 1.97 انچ بارش لاگارڈیا ایئرپورٹ پر ریکارڈ کی گئی، جو 1955 کے بعد اب تک کی سب سے زیادہ ہے۔ سینٹرل پارک میں بھی 1.80 انچ بارش ریکارڈ ہوئی، جو 1917 کا ریکارڈ توڑ گئی۔

شدید بارش کے باعث شہر کے متعدد علاقوں میں بجلی منقطع ہوگئی، گاڑیاں پھنس گئیں اور پروازوں میں تاخیر ہوئی۔