وادی تیراہ میں منشیات کی کاشت اور اس کے عالمی نیٹ ورک کے حوالے سے نئے انکشافات سامنے آئے ہیں۔ اطلاعات کے مطابق یہ غیر قانونی کاروبار جرائم پیشہ عناصر اور سیاسی سرپرستی کے ذریعے چلایا جا رہا ہے۔

ایک حالیہ ویڈیو میں یہ واضح کیا گیا ہے کہ وادی تیراہ میں منشیات کی کاشت، ترسیل اور اس سے حاصل ہونے والی آمدنی دہشت گردی کی مالی معاونت میں استعمال ہو رہی ہے۔

ذرائع کے مطابق وادی تیراہ اور خیبر میں تقریباً 12 ہزار ایکڑ رقبے پر منشیات کی کاشت کی جاتی ہے جس سے 18 سے 25 لاکھ روپے فی ایکڑ تک منافع حاصل ہوتا ہے۔

اس منافع کا ایک حصہ خوارج اور دہشت گرد گروپوں کے حصے میں آتا ہے، جو اس غیر قانونی کاروبار سے اپنے مالی وسائل کو مضبوط کرتے ہیں۔

ذرائع کا مزید کہنا ہے کہ سیاسی اور دہشت گردی کے نیکسس کی وجہ سے خیبر پختونخوا میں دہشت گردی میں اضافہ ہوا ہے اور اسی نیکسس کے تحت دہشت گردوں کے خلاف آپریشنز کی مخالفت کی جاتی ہے۔

سیکیورٹی ادارے منشیات کی اس غیر قانونی سرگرمی کے خاتمے کے لیے پرعزم ہیں، اور اس حوالے سے مزید کارروائیاں جاری ہیں۔