عدالت عالیہ نے سندھ حکومت کو باربر شاپس کھولنے کے لیے نظر ثانی کی ہدایت کرتے ہوئے کہا کہ جب چھوٹی بڑی مارکیٹوں کو کھول دیا گیا ہے توحجام کی دکانیں کیوں بند ہیں ؟عید پرلوگ بال کیسے کٹوائیں گے؟

سندھ ہائی کورٹ میں سماعت پرایڈیشنل ایڈووکیٹ جنرل سندھ نے مؤقف اپنایا کہ بیوٹی پارلرز اور باربرز کی دکانیں بند رکھی جارہی ہیں کیونکہ کورونا پھیلنے کا زیادہ خدشہ ہے، حجام اور بیوٹی پارلرز ہوم سروس فراہم کرسکتے ہیں۔

جسٹس محمد علی مظہر نے ریمارکس دئے کہ جب چھوٹی بڑی مارکیٹوں کو کھول دیا گیا تو حجام کی دکان کیوں بند ہیں؟ حجام کی دکانیں بند رکھی جارہی ہیں تو لوگ عید پر بال کیسے کٹوائیں گے؟عدالت نے ہدایت کی کہ حجام کی دکان کے لیے بھی ایس او پیز بنادیں اور عملدرآمد نہ ہو تو بند کرسکتے ہیں۔