آج کے جدید دور میں جہاں بچے پالنا قدرے آسان ہوگیا ہے وہیں والدین کو کچھ مشکلات کا سامنا بھی کرنا پڑتا  ہے۔

اکثر والدین کو  شکایت رہتی ہے کہ ان کا بچہ  ہر وقت موبائل میں گھسا رہتا ہے ، یہاں تک کے کھاتے وقت بھی موبائل کا پیچھا نہیں چھوڑتا۔

یہ تو سب  ہی جانتے ہیں کہ موبائل فون اور ٹیلی ویژن اسکرین کا زیادہ استعمال سب کے لیے ہی شدید نقصان دہ ہے لیکن بچوں کے لیے یہ چیزیں انتہائی خطرناک ثابت ہوسکتی ہیں ۔

موبائل فون کے بچوں پر برے اثرات میں   سر درد،  نظر کمزور ہونا، جسمانی سرگرمیوں سے دوری، بیٹھنے کا انداز غلط ہوجانا،موٹاپا ،نیند میں کمی اور  ذہنی دباؤ قابل ذکر ہیں۔

اس کے علاوہ مارپیٹ والے گیمز کھیلنے کی وجہ سے بچوں میں غصے اور انتشار میں اضافہ ہونا معمول کی بات ہے۔

ایسے میں بچوں کو موبائل  فون اور ٹی وی کے بغیر  یا اس کے استعمال کو کم کرکے گزارہ کرنا کیسے سکھایا جائے ؟

 آئیے ہم آپ کو بتائیں کہ کس طرح بچوں کو ان چیزوں سے دور رکھ کر بھی خوش رکھا جاسکتا ہے۔

بچوں کے لیے نئے مشاغل متعارف کروائیں:

بچوں کے لیے نئے مشاغل متعارف کروائیں جیسے فٹ بال، کرکٹ، دوڑ، کتابیں پڑھنا وغیرہ جس سے وہ اپنی انرجی کو مثبت طور پر استعمال کر سکیں۔

ان ڈور گیمزکا اہتمام:

یقیناً آپ سب نے ہی اپنے بچپن میں لوڈو، کیرم بورڈ اور اس طرح کے دیگر مزے دار بورڈ اور کارڈ  گیمز  یا پھر چھپن چھپائی وغیرہ ضرور کھیلے ہوں گے  ۔ان گیمز کو آپ آج بھی اپنے بچوں کے ساتھ کھیل سکتے ہیں ۔

گھر کے کچھ کام بچوں کے لیے مخصوص کردیں:

بچوں میں احساس ذمہ داری پیدا کرنے کے لیے انہیں بچپن سے گھر کے چھوٹے موٹے اور بے ضرر کاموں کی ذمہ داری سونپ دیں مثلاً  پودوں کو پانی دینا، اپنا کمرا خود صاف کرنا، اپنے کپڑے اور کتابیں الماری میں ترتیب سے رکھنا وغیرہ ۔

واک:

بچوں کو نزدیک کسی پارک میں واک پر لے جانے سے ان میں فطرت سے لگاؤ پیدا ہوگا جو ان کی صحت پر بھی خوشگوار اثرات مرتب کرے گا۔

بچوں کو دوست  بنانا سکھائیں:

بچوں کو دوسرے بچوں اور رشتے داروں سے ملوانے لے کر جائیں ،اس طرح بچوں میں ملنساری اور میل ملاپ کا جذبہ پیدا ہوگا وہ دوست بنانا سیکھیں گے جو ان کی آنے والی زندگی میں بھی کام آئے گا۔

ہر کام کے لیے وقت مقرر کردیں:

بچوں کے ہر کام کا وقت مقرر کریں تا کہ ان کو اپنے روٹین کا اندازہ ہو۔ وقت اس طرح سے مقرر کریں کہ بچوں کے پاس موبائل فون اور ٹیلی ویژن استعمال کرنے کا وقت  کم سے کم بچے ۔

سب سے اہم بات یہ ہے کہ بچے ماں باپ کا عکس ہوتے ہیں وہ وہی کریں گے جو آپ کو کرتا دیکھیں گے اس لیے آپ خود بھی ان کے سامنے ہر وقت موبائل کا استعمال ترک کردیں تاکہ ان کے سامنے مثالی والدین بن سکیں۔