انسان سماجی طور الگ تھلگ نہیں رہ سکتا اسے کسی نہ کسی رشتے یا سہارے کی ضرورت ہوتی ہے۔زندگی میں حقیقی رشتوں کے علاوہ کچھ اور بھی رشتے بنتے ہیں جو بعض اوقات حقیقی رشتوں سے بھی زیادہ مضبوط اور قابل بھروسہ ہوتے ہیں انہی میں دوست بھی شامل ہیں۔

لیکن دنیا میں بہت سے لوگ اس حوالے سے خوش قسمت نہیں ہوتے، کیونکہ وہ اکثر دوستوں کے نام سے دھوکہ کھا جاتے ہیں،  اس طرح انہیں سچے اور حقیقی دوستوں میں فرق معلوم نہیں ہوپاتا۔ کچھ لوگ آپ کے ساتھ دوستی کرتے ہیں اور اپنے آپ کو آپ کا دوست کہتے ہیں لیکن حقیقت میں وہ آپ کو دوست نہیں ہوتے بلکہ مفاد پرست ہوتے ہیں۔

  جعلی اور نام کے دوست وہ لوگ ہوتے ہیں جو آپ کی پرواہ کرنے کا صرف بہانہ کرتے ہیں لیکن درحقیقت آپ کے بہترین مفادات دل میں نہیں رکھتے۔

شکاگو کے کلیرٹی کلینک میں طبی ماہر نفسیات، ایمی ڈیرامس کا کہنا ہے کہ ایسے دوستوں کو جھوٹے دوست یا اچھے وقت دوست کے نام سے بھی جانا جاتا ہے، وہ دوستوں کی طرح صرف اسی وقت پیش آتے ہیں جب اس سے انہیں فائدہ ہوتا ہے۔

حقیقی دوست جذباتی اور عملی طور پر ہر وقت آپ کی مدد کرنے کے لیے تیار رہتے ہیں اچھے دوست ہونے سے آپ ذہنی طور پر خود کو پرسکون محسوس کرتے ہیں، جبکہ اس کے برعکس جعلی دوست پر بھروسہ کرنا مشکل ہو سکتا ہے، کیونکہ جب آپ کو واقعی ان کی ضرورت ہوتی ہے تو وہ آپ کے لیے حمایت، ہمدردی یا وفاداری ظاہر نہیں کرتے۔

یہاں پر ایسے ہی نام نہاد دوست کی دس نشانیاں بتائی جارہی ہیں جن کی بدولت آپ اپنے سچے اور نام کے دوست کو آسانی سے پہچان سکتے ہیں۔

جعلی دوست کی چند نشانیاں یہ ہیں

مطلب پرست

ایسے دوست جب انہیں کسی چیز کی ضرورت ہوتی ہے تو وہ آپ کے ساتھ ہوتے ہیں، لیکن جب آپ کو کسی چیز کی ضرورت ہوتی ہے، تو اس وقت غائب ہوجاتے ہیں یا بہانہ بناتے ہیں۔

یک طرفہ تعلق

ایسے افراد جب بھی بات کرتے ہیں وہ اپنی ہی بات کرتے ہیں ان کی گفتگو ان ہی سے شروع ہوتی ہے اور انہی پر ختم ہوتی ہے اور وہ آپ کی زندگی کے معاملات میں  بلکل دلچسپی نہیں لیتے۔

ناقابل اعتبار

ڈاکٹر دارامس کا کہنا ہے کہ وہ ناقابل اعتبار ہو تے ہیں اور شاذ و نادر ہی اپنے وعدوں کو پورا کرتے ہیں۔ آپ کو کسی بھی چیز کے لئے ان پر اعتماد کرنا قدرے مشکل لگتا ہے۔ مثال کے طور پر، وہ آپ کے ساتھ کسی بھی کام کے بارے میں منصوبہ بناتے اور ساتھ نبھانے یا مدد کرنے کا وعدہ کر تے ہیں لیکن آخری لمحات میں آپ کو مشکل وقت میں چھوڑ دیتے ہیں۔

دھوکہ

دوست کہلانے والا شخص وفادار نہ ہو۔ آپ کے اعتماد کی اسے کوئی قدر نہ ہو، اور آپ کی پیٹھ کے پیچھے آپ کی برائی کرنے والا ہو یا آپ کے بارے میں افواہیں پھیلا تا ہو۔

بے عزتی

جو شخص دوسروں کے سامنے آپ کی عزت نہ کرے،  حقیر سمجھے، تضحیک یا تذلیل کرے۔

تکلیف دہ رویہ

ڈاکٹر دارامس کے مطابق وہ ایسی باتیں کہہ کر یا آپ کی بات کی نفی کرتا ہے جو آپ کے لیے تکلیف کا باعث بنے، لیکن دعویٰ یہ کرتا ہو کہ وہ آپ کی مدد کرنے کی کوشش کر رہا ہے۔ مثال کے طور پر، وہ یہ کہہ سکتا ہے کہ آپ اس لباس میں برے لگ رہے ہیں۔ میں صرف ایماندار ی سے اپنی رائے دے کر آپ کی مدد کرنے کی کوشش کرہا ہوں۔

حسد

وہ آپ کی کامیابیوں سے خوش ہونے کے بجائے آپ کو خطرہ سمجھنا شروع کر دے۔ آپ کی کامیابیوں کا جشن منانے کے بجائے، وہ ان کو کم کرنے یا آپ سے مقابلہ کرنے کی کوشش کرنے لگ جائے۔

مشروط دوستی

ان کی دوستی اکثر اس بات پر منحصر ہوتی ہے کہ وہ آپ سے کیا حاصل کر سکتے ہیں، چاہے وہ سماجی حیثیت ہو، مادی املاک، مالی فائدہ، یا دیگر قسم کے فوائد۔ ایک بار جب وہ اپنا مقصد حاصل کر لیتے ہیں تو ان کی دلچسپی کم ہو جاتی ہے۔

ہیرا پھیری

وہ آپ سے جو چاہیں حاصل کرنے کے لیے ہیرا پھیری یا جذباتی بلیک میل کا استعمال کر سکتے ہیں۔

نظر اندازکرنا

وہ مسلسل آپ کی حدود  سے تجاویز کرتے دکھائی دیتے ہیں یا نظر انداز کرتے ہے، چاہے یہ آپ کی ذات سے منسلک کوئی بات ہو، کوئی راز ہو یا جذباتی حدود ہوں۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.bolnews.com/urdu/lifestyle/2023/10/781647/amp/ کو لائک کریں

ٹوئٹر پر ہمیں فولو کریں https://www.bolnews.com/urdu/lifestyle/2023/10/781647/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں