کافی آپ کو صرف جگاتی ہی نہیں بلکہ کئی امراض سے تحفظ بھی فراہم کرتی ہے، یہ بات حال ہی میں کی جانے والی ایک تحقیق میں سامنے آئی ہے۔

اینڈو کرائن سوسائٹی کے جرنل آف کلینیکل اینڈو کرائنولوجی اینڈ میٹابولزم میں شائع ہونے والی تحقیق کے مطابق کیفین سے بھر پور مشروبات  کا اعتدال میں استعمال جیسا کہ دن میں تین کپ یا اس سے کم کارڈیو میٹابولک ملٹی موربیڈیٹی کے خطرے کو کم کر سکتا ہے۔

کارڈیو میٹابولک ملٹی موربیڈیٹی (CM) کا مطلب ہے کہ کسی شخص کو بیک وقت دو یا اس سے زیادہ کارڈیو میٹابولک بیماریاں لاحق ہوں، جیسے کہ دل کی بیماری، فالج اور ٹائپ 2 ذیابیطس۔

چین کی سوشو یونیورسٹی میں وبائی امراض اور بایوسٹیٹسٹکس کے ایسوسی ایٹ پروفیسر، ڈاکٹر چاؤفو نے کہا کہ کیفین کا استعمال سی ایم کی نشوونما کے تقریباً تمام مراحل میں ایک اہم حفاظتی کردار ادا کر سکتا ہے۔

اگرچہ مختلف تحقیق کے نتیجے میں کافی کے استعمال کے کئی فوائد سامنے آچکے ہیں، تاہم یہ تحقیق اس بات کی ضمانت نہیں دیتی کہ کیفین کا باقاعدہ استعمال ہر ایک کے لیے مفید ثابت ہوسکتا ہے، “زیادہ کیفین، خاص طور پر انرجی ڈرنکس جیسی مصنوعات میں، دل کے مسائل کا سبب بن سکتے ہیں۔