ترکیہ سے تعلق رکھنے والے 5 سالہ بچے کی 2022 میں پاکستان کے سیلاب متاثرین کے لیے لکھا جانے والا خط ایک دفعہ پھر سوشل میڈیا پر وائرل ہو گیا۔

ترکیہ میں پانچ سالہ یونس ہاجد نے 2022 میں پاکستان کے سیلاب متاثرین کے لیے ایک ایسا  قدم اٹھایا تھا جس نے دنیا بھر میں انسانیت کے جذبے کو نئی زندگی بخشی۔

ذرائع کا کہنا ہے کہ یونس نے اپنے اسکول ٹرپ کے لیے جمع کی ہوئی جیب خرچی میں سے 50 لیرا (ترک کرنسی) پاکستانی سفارت خانے کو بھیجے اور ساتھ ہی ایک خط بھی لکھا جس میں پاکستانی عوام کے ساتھ ہمدردی کا اظہار کیا۔

واضح رہے کہ ترکیہ میں موجود پاکستانی سفارت خانے نے باضابطہ اس خط کی تصدیق نہیں کی تھی۔

خط میں یونس باجد نے لکھا کہ محترم سفیر صاحب، ہم اپنے برادر ملک پاکستان میں سیلاب سے پیدا ہونے والی صورتحال پہ بہت غمزدہ ہیں اور اپنے پاکستانی بہن بھائیوں کے غم میں برابر کے شریک ہیں۔

ترک بچے نے مزید لکھا کہ ہماری دعائیں پاکستان کے ساتھ ہیں، میری والدہ آپ کے لیے قرآن پاک کی تلاوت کرتی ہیں اور میرا پورا خاندان آپ کے لیے دعاگو ہے۔ میں اسکول ٹرپ کے لیے اپنی جمع شدہ جیب خرچی اپنے برادر پاکستان کو دیتا ہوں، اللہ آپ کی مدد فرمائے۔

یہ چھوٹی سی مگر گہری انسانی محبت کی مثال سوشل میڈیا پر وائرل ہو گئی ہے، جسے پاکستانی سفارت خانے نے اپنے آفیشل ٹویٹر اکاؤنٹ سے شیئر کیا۔

یونس کا یہ پیغام نہ صرف ترکی اور پاکستان کے درمیان محبت و بھائی چارے کی علامت بن گیا، بلکہ یہ ہمیں انسانیت اور یکجہتی کا حقیقی مفہوم بھی سکھاتا ہے۔