موبائل فون کی ایجاد نے جہاں رابطے کو سہل بنادیا ہے وہی اس نے کئی امراض کے خطرے کو بھی بڑھا دیا ہے بواسیر ان ہی میں سے ایک ہے۔

ایک نئی تحقیق سے یہ بات سامنے آئی ہے کہ باتھ روم میں موبائل کا استعمال بواسیر کے خطرے کو بڑھاسکتا ہے۔

کیا آپ بھی ٹوائلٹ پر بیٹھے بیٹھے خبریں پڑھتے ہیں، ای میلز چیک کرتے ہیں یا سوشل میڈیا پر وقت گزارتے ہیں؟ تو احتیاط کریں، یہ عمل بواسیر ہونے کے امکان کو بڑھا سکتا ہے۔

جو لوگ ٹوائلٹ پر اسمارٹ فون استعمال کرتے ہیں، ان میں بواسیر ہونے کا خطرہ ان لوگوں کے مقابلے میں 46 فیصد زیادہ ہوتا ہے جو ایسا نہیں کرتے۔

محققین کا کہنا ہے کہ اسمارٹ فون کا استعمال ممکنہ طور پر ٹوائلٹ پر بیٹھنے کا وقت بڑھا دیتا ہے، جس کی وجہ سے مقعد (Anus) پر دباؤ بڑھتا ہے، اور یہ بواسیر کا باعث بن سکتا ہے۔

یہ بھی پڑھیں: کیا موبائل کے نوٹیفیکیشن صحت کے لیے مضر ہیں، ماہرین کیا کہتے ہیں؟

بواسیر کے مرض میں مقعد کے راستے میں موجود رگوں میں ورم آجاتا ہے، یہ حمل کے دوران، زیادہ وزن یا رفع حاجت کے دوران مقعد پر دباؤ کی وجہ سے جنم لیتا ہے، ورم کی وجہ سے شدید درد اور خون کے اخراج ہونے لگتا ہے۔

اس نئی تحقیق میں، محققین نے بیت اسرائیل ڈیکونیس میڈیکل سینٹر میں کولونواسکوپی کرانے والے 125  افراد سے سوالات کیے، جن میں سے 43 فیصد کو بواسیر تھی۔

ان میں سے 66  فیصد افراد نے بتایا کہ وہ ٹوائلٹ پر اسمارٹ فون استعمال کرتے ہیں، جبکہ اس ضمن میں خبروں کا مطالعہ اور سوشل میڈیا استعمال کرنا سب سے عام سرگرمیاں تھیں۔

محققین کا کہنا ہے کہ اسمارٹ فون استعمال کرتے ہوئے وقت کا اندازہ لگانا بہت مشکل ہوتا ہے، تاہم ہر بار ٹوائلٹ پر زیادہ وقت گزارنا بواسیر کے خطرے کو بڑھا سکتا ہے، کوشش کریں کہ باتھ روم میں فون ساتھ نہ لے کر جائیں، اور رفع حاجت کے لیے چند منٹ سے زیادہ وقت نہ لگائیں۔