حکومت نے وفاقی دارالحکومت میں پلاسٹک بیگز کے استعمال پر پابندی عائد کردی۔

وزیر مملکت برائے موسمیاتی تبدیلی زرتاج گل نے کہا ہے کہ 14 اگست سے اسلام آباد میں پلاسٹک بیگزکے استعمال پرپابندی ہوگی۔

وزیر مملکت نے مزید کہا کہ موسمیاتی تبدیلی کے باعث پاکستان کو سیلاب، پانی کی کمی، ہیٹ ویوز سمیت دیگر مسائل کا سامناہے ، ان مسائل پر قابو پانے  کے لیےحکومت نے بلین ٹری سونامی سمیت اہم منصوبے شروع کئے ہیں ، جس کے مثبت اثرات مرتب ہوں گے ، ہماری حکومت نے کلین گرین اینی شیٹو کا بھی آغاز کیا ہے۔

ان کا  مزیدکہنا تھا کہ موسمیاتی تبدیلی پر وزیراعظم عمران خان کی بہت زیادہ توجہ ہے اور وہ اس حوالے سے خصوصی دلچسپی لے رہے ہیں۔ وزیراعظم عمران خان ملک کو درپیش موسمیاتی تبدیلی کے اثرات سے بخوبی آگاہ ہیں ۔

یاد رہے کہ حکومت نے وفاقی دارالحکومت اسلام آباد میں  14 اگست2019 سے پلاسٹک بیگ کے استعمال پر پابندی عائد کرنے کا فیصلہ رواں سال 17مئی کو کیا تھا۔