سعودی عرب کی جانب سے پاکستانی عازمین حج کی سہولت کیلئے اسلام آبادائیرپورٹ سے روڈ ٹو مکہ پراجیکٹ شروع کردیاگیا۔

تفصیلات کے مطابق وزارت مذہبی امور کے ترجمان کاکہناہےکہ منصوبے کے آغازکے سلسلےمیں سعودی وفداسلام آباد پہنچا ہے۔

انہو ں نے کہاکہ روڈ ٹومکہ منصوبے کے لئے اسلام آبادائیرپورٹ پرکائونٹرقائم کرنے کا کام مکمل کرلیاگیا اورسعودی وفدنےاسلام آبادائیرپورٹ پراپنی ذمہ داریوں کی ادائیگی شروع کردی۔

روڈ ٹو مکہ منصوبے کے تحت سعودی عرب کا امیگریشن عملہ اسلام آباد ائیرپورٹ پر پاکستانی عازمین کے تمام امیگریشن مراحل مکمل کریگا۔

دوسری جانب وزارت مذہبی امور نے سرکاری اسکیم کے تحت عازمین حج کے لئے ای ویزہ کا اجراء شروع کر دیا اورملک بھر میں دس حاجی کیمپوں نے کام شروع کردیا ہے۔ عازمین حج کو حج پروازوں سے قبل پاسپورٹ، ٹکٹ، لاکٹ اور اسٹکرز فراہم کئے جائیں گے۔حج پروازیں جمعرات سے شروع ہوں گی۔

واضح رہے کہ وزیراعظم عمران خان روڈ ٹو مکہ پراجیکٹ کا افتتاح جمعرات کو اسلام آباد ائیرپورٹ پر کریں گے۔

روڈ ٹو مکہ پراجیکٹ کے تحت عازمین حج کو امیگریشن کی سہولت اندرون ملک ہی فراہم کی جائے گی۔

حکومتی پراجیکٹ کا مقصد عازمین کو سہولت فراہم کرنا ہے تاکہ وہ جدہ اور مدینہ ائیرپورٹ پر امیگریشن کے طویل انتظار سے بچ سکیں۔