کراچی کے علاقے بہادرآباد میں پندرہ سالہ لڑکے کو  چوری کے الزام میں تشدد کرکے قتل کردیا  گیا۔

پولیس حکام کا کہنا ہے کہ پندرہ سالہ لڑکا اور اس کا ساتھی کوکن سوسائٹی کے قریب ایک بنگلے میں داخل ہوئے تھے اور گارڈ نے ایک کو پکڑلیا جبکہ اس کا ساتھی فرار ہوگیا۔

پکڑے گئے لڑکے کا نام ریحان بتایا جارہا ہے جس کو بنگلے میں باندھ کر گھر والوں اور علاقے کے لوگوں نے بدترین تشدد کا نشانہ بنایا گیا ۔

پولیس کا کہنا ہے کہ ریحان کے خلاف بہادر آباد تھانے میں دو مقدمات پہلے سے درج ہیں ۔

پولیس کی جانب سے گھر کے 2 افراد کو زیر حراست لیا جاچکا ہے، پولیس کے مطابق دونوں گھر کے افراد اور دیگر لوگوں نے 15 سالہ ریحان کے ساتھ مار پیٹ کی جبکہ کم عمر چورریحان کی ہلاکت کامقدمہ دانیال اور زوبیرکے خلاف درج کرلیا گیا ہے۔

مقدمہ الزام نمبر 240/2019 ریحان کے والد محمد سعیدکی مدعیت میں درج کیا گیا جبکہ مقدمے میں دفعہ 316 شامل کی گئی ہیں۔

پوسٹ مارٹم رپورٹ میں کہا گیا ہے کہ لڑکے کی موت سر پر چوٹ لگنے سے ہوئی، اہل خانہ کا کہنا ہے کہ ریحان قصائی کا کام کرتا تھا، رات سے گھر نہیں آیا، آج اس کی ہلاکت کی خبر ملی۔