سینیٹ میں قائد ایوان شبلی فراز نے کہا ہے کہ ہمیں اپوزیشن سے کوئی شکوہ نہیں ہے، قانون سازی کیلئے ہم نے آگے مل کر چلنا ہی ہوگا۔

تفصیلات کے مطابق چیئرمین سینیٹ صادق سنجرانی کےخلاف تحریک عدم اعتماد کوناکام بنانےکےلیےقائد ایوان شبلی فرازکی زیر صدارت حکومتی و اتحادی سینیٹرز کا اجلاس ہوا۔

اجلاس کے بعد میڈیا سے گفتگو کرتے ہوئے شبلی فراز نے کہا کہ یہ کسی کی جیت نہیں ہے یہ جیت سنییٹ کے ادارے کی ہے۔

 شبلی فراز کا کہنا تھا کہ بڑی سیاسی جماعتیں اس معاملے پر استعمال ہوئی ہیں۔

شبلی فراز نے یہ بھی کہا کہ مولانا فضل الرحمان کے پاس گئے تو وہ سمجھے ہم مدد مانگنے آئے ہیں۔

قائد ایوان شبلی فراز کا مزید کہنا تھا کہ ہم نے جمہوریت کو مضبوط کیا ہےاور ہاوس کا وقار بھی برقرار رکھا ہوا ہے۔

اس سے قبل سینیٹ میں چیئرمین صادق سنجرانی کیخلاف تحریک عدم اعتمادپرہونےوالےاجلاس میں رائے شماری مکمل کرلی گئی جس کےتحت اپوزیشن کی صادق سنجرانی کوعہدےسےہٹانے کی تحریک کامیاب نہ ہوسکی۔