کشمیریوں سے اظہار یکجہتی کا ابتدائی پروگرام تیار کر لیا گیا ہے، جمعے کے روز  ملک بھر میں 12 سے ساڑھے 12 بجے تک ٹریفک روک دی جائے گی۔

تفصیلات کے مطابق جمعے کے دن مقبوضہ کشمیر میں بھارتی فوج کے مظالم کے شکار مظلوموں کے ساتھ اظہار یکجہتی کے لیے ملک گیر احتجاج کیا جا رہا ہے۔

اس سلسلے میں ابتدائی پروگرام ترتیب دے دیا گیا ہے، وفاقی حکومت کا مرکزی اجتماع شاہراہ دستور پر ہوگا۔

ذرائع کے مطابق جمعے کی نماز سے قبل 12 سے ساڑھے 12 بجے تک ملک بھر میں ٹریفک روک دی جائے گی۔

وزیر اعظم عمران خان وزیر اعظم سیکریٹریٹ کے سامنے اجتماع کی قیادت کریں گےجبکہ ملک بھر کے تمام اضلاع میں مخصوص مقامات پر بھی احتجاج کیا جائے گا۔

احتجاج کے لیے جگہ کے تعین کے لیے ڈپٹی کمشنرز کو ٹاسک سونپا گیا ہے۔

احتجاج کے لیے سِول سوسائٹی اور طلبہ کو بھی دعوت دی گئی ہے جبکہ عوامی نمایندے اپنے حلقوں میں احتجاج کی قیادت کریں گے۔

ادھر معاون خصوصی برائے اطلاعات فردوس عاشق نے ٹوئٹر پیغام کے ذریعے کہا ہے کہ قوم جمعے کو 12 سے ساڑھے 12 بجے تک کشمیریوں سے اظہار یک جہتی کرے گی۔

انھوں نے کہا کہ جمعے کے روز آدھے گھنٹے کے لیے ٹریفک روکی جائے گی، اجلاس جاری ہوا تو عمران خان کی قیادت میں وزیر اعظم آفس کے باہر جمع ہوں گے، ہر ڈسٹرکٹ میں مظاہرہ کرنے کے لیے ڈپٹی کمشنر مقامات کا تعین کریں گے۔