آرمی چیف جنرل قمر جاوید باجوہ کی مدت  ملازمت میں 3 سال کی توسیع کردی گئی ۔

وزیراعظم ہاؤس سے جاری بیان کے مطابق وزیراعظم  عمران خان نےآرمی چیف جنرل قمر جاوید باجوہ کی مدت ملازمت میں تین سال کی  توسیع  کردی ہے جس کا نوٹیفیکیشن جاری کر دیا گیا ہے۔

بیان میں کہا گیا کہ وزیراعظم  نے فیصلہ ملک اور خطے میں جاری امن کی کوششوں کے تسلسل  اور علاقائی سلامتی کی صورتحال کے پیش نظر کیا ۔

خیال رہے کہ 29 نومبر 2016 کو آرمی چیف جنرل قمر جاوید باجوہ نے جنرل راحیل شریف کی جگہ پاک فوج کی قیادت سنبھالی تھی۔ اس وقت کے صدر ممنون حسین کی تجویز پر اس وقت کے وزیراعظم نواز شریف نے انہیں تین سال کے لیے آرمی چیف مقرر کیا تھا۔

جنرل قمر جاوید باجوہ نے فوجی کیریئر کا آغاز 16 بلوچ ریجمنٹ سے اکتوبر 1980ء میں کیا تھا۔

جنرل قمر جاوید باجوہ کینیڈین فورسز کمانڈ اینڈ اسٹاف کالج (ٹورنٹو)، نیول پوسٹ گریجویٹ یونیورسٹی مونٹیری (کیلی فورنیا) ،نیشنل ڈیفنس یونیورسٹی اسلام آباد کے گریجویٹ ہیں۔

وہ کوئٹہ میں انفرینٹری اسکول میں انسٹرکٹر کے طور پر فرائض سر انجام دے چکے ہیں جبکہ وہ کانگو میں اقوام متحدہ کی امن فوج کی کمانڈ بھی سنبھال چکے ہیں۔

قمر جاوید باجوہ آرمی کی سب سے بڑی 10 ویں کور کو کمانڈ کرچکے ہیں جو لائن آف کنٹرول (ایل او سی) کی ذمہ داری سنبھالتی ہے۔

واضح رہے کہ پاکستان کی سول حکومت کی تاریخ میں دوسری مرتبہ آرمی چیف کی مدت ملازمت میں توسیع کی گئی ہے۔

ان سے قبل سابق آرمی چیف جنرل اشفاق پرویز کیانی کی مدت ملازمت میں توسیع کی گئی تھی اور اس وقت ملک میں پاکستان پیپلز پارٹی کی حکومت تھی۔