میئر کراچی وسیم اختر کا پاسپورٹ انسداد دہشت گردی عدالت میں جمع کرادیا گیا ہے تا ہم وہ سانحہ 12مئی اور اشتعال انگیز تقریر کیس میں ضمانت پر ہیں۔

تفصیلات کے مطابق انسداد دہشتگردی کی خصوصی عدالت میں دہشتگردوں کو علاج کی سہولتیں فراہم کرنے سے متعلق کیس کی سماعت ہوئی تو عدالت نے میئر کراچی پر برہمی کا اظہار کیا  اور ساتھ  ہی عدالت نے ریمارکس دیئے کہ آپ مئیر تو کراچی کے ہیں لیکن شہر کے لیے کچھ کیا نہیں، آپ کو پاسپورٹ آفیشل وزٹ کے لیے واپس دیا گیا تھا اگر آپ آفیشل وزٹ نہیں کررہے ہیں تو پاسپورٹ واپس جمع کرائیں۔

خیال رہے وسیم اختر دہشت گردوں کے علاج، سانحہ 12مئی اور اشتعال انگیزتقریر کیس میں ضمانت پر ہیں، 4مقدمات میں میئرکراچی وسیم اختر و دیگر ملزمان پر پر فرد جرم عائد ہوچکی ہے ، ملزمان نے صحت جرم سے انکار کردیا تھا۔

یاد رہے 14 ستمبر کو انسداد دہشت گردی عدالت میں میئر کراچی وسیم اختر کو بیرون ملک جانے کی اجازت دی تھی ، میئر کراچی وسیم اختر نے کہا تھا کہ دبئی میں مقیم اہل خانہ سے ملنے کے لیے جانا ہے۔