وفاقی وزیر علی زیدی کا کہنا ہے کہ کراچی بہتر ہوگا تو ملکی معیشت بہتر ہوگی۔

ایف پی سی سی آئی میں تقریب سے خطا ب میں علی زیدی کا کہنا تھا کہ شہر کا کچرا اور کچرا کنڈیاں ٹھیکوں پر بیچی جاتی ہیں۔

علی زیدی نے کہا کہ اپنی وزارت کو ڈیجیٹل کرنے کی طرف لے جا رہے ہیں، اگلے ہفتے سے فائلز کو ای فائل پر منتقل کرنے جا رہے ہیں۔ کراچی کا انفرا اسٹرکچر تباہ اور جگہ جگہ کچرا پڑا ہے جبکہ کراچی کے انفرا اسٹرکچر میں تمام انتظامی امور آتے ہیں لیکن اب پاکستان کو آگے لے جانے کے لیے نئی چیزوں کے بارے میں سوچنا ہوگا۔

علی زیدی نے کہا کہ ایف ڈبلیو او کے تعاون سے نالوں کی صفائی کا کام سنبھالا، اگلے دن ڈی ایم سی کھڑی ہوجاتی ہے کہ ہم کچرا اٹھائیں گے، کچرا کنڈیوں کو ٹھیکے پر فروخت کیا جاتا ہے جبکہ کچرےمیں لوہے کا سامان، تاریں وغیرہ ہوتی ہیں۔

تقریب سے خطاب کرتے ہوئے وفاقی وزیر نے کہا کہ میری ٹائم کا معیشت سے گہرا تعلق ہے، دنیا کہاں پہنچ گئی اور ہم وہیں کھڑے ہیں۔