سابق وزیر اعظم میاں نواز شریف کے بعد پنجاب اسمبلی میں اپوزیشن لیڈر حمزہ شہباز نے بھی جیل میں سہولتوں کی ڈیمانڈ کر دی۔

تفصیلات کے مطابق لاہور میں جیل سپرنٹنڈنٹ کے دورے کے موقع پر پنجاب اسمبلی میں اپوزیشن لیڈر حمزہ شہباز نے اپنی خواہشات کا اظہار کیا۔

جیل سپرنٹنڈنٹ نے آئی جی جیل کو صورتحال سے آگاہ کر دیا اور آئی جی جیل نے وزیر اعلی سیکرٹریٹ کو حمزہ شہباز شریف کی خواہشات سے متعلق بتا دیا ہے۔

ذرائع کے مطابق حمزہ شہباز شریف نے جیل میں اے سی کی سہولت فراہم کرنے اور اپنی بیرک میں فرنیچر رکھنےکا مطالبہ کردیا ہے۔

واضح رہے کہ لاہور ہائی کورٹ نے پاکستان مسلم لیگ ن کے رہنما اور پنجاب اسمبلی میں اپوزیشن لیڈر حمزہ شہباز شریف کی عبوری ضمانت کی درخواست خارج ہونے کے بعد قومی احتساب بیورو (نیب) کے اہلکاروں نے انھیں احاطہ عدالت سے ہی گرفتار کر لیا تھا۔

یہ گرفتاری ایک ایسے وقت پر عمل میں آئی ہے جب ملک میں کافی سیاسی گہما گہمی پائی جا رہی ہے۔ گذشتہ روز اسلام آباد ہائی کورٹ کی جانب سے ضمانت منسوخ ہونے کے بعد پاکستان پیپلز پارٹی کے شریک چیئرپرسن اور سابق صدر آصف علی زرداری کو بھی گرفتار کر کے آج عدالت میں پیش کیا گیا  تھا ۔

یاد رہے کہ آمدن سے زائد اثاثہ جات کیس میں حمزہ شہباز نیب کو مطلوب ہیں اور اپریل میں نیب نے ان کی گرفتاری کے لیے لاہور میں ان کی رہائش گاہ پر چھاپے بھی مارے تھے،تاہم گرفتاری عمل میں نہ آ سکی۔

اس موقعے پر نیب حکام نے پولیس اہلکاروں کی ایک ٹیم کے ہمراہ حمزہ شہباز کی رہائش گاہ پر ان کی گرفتاری کے لیے چھاپہ مارا تھا۔