رحیم یارخان میں پولیس تشدد سے جاں بحق ہونیوالے ذہنی معذور صلاح الدین گوجرانوالہ کے گاوں میں سپرد خاک کردیا گیا۔

تفصیلات کے مطابق پاکستان کے صوبہ پنجاب کے ضلع رحیم یار خان میں صلاح الدین پرالزام تھا کہ وہ اے ٹی ایم سے کارڈ چراتا ہے، پولیس نے صلاح الدین کورحیم یار خان سے حراست میں لیا اور گرفتاری کے اگلے روزصلاح الدین جاں بحق ہوگیا ۔

ذرائع کے مطا بق دودن بعد صلاح الدین کی لاش والد کے حوالے کردی گئی،صلاح الدین کوآج گوجرانوالہ کے گاوں میں سپرد خاک کردیا گیا،نمازجنازہ میں اہل علاقہ اور عزیزواقارب کی کثیرتعداد نے شرکت کی۔

صلاح الدین  کے بھائی نے وزیراعظم ،آرمی چیف ،اورچیف جسٹس سے انصاف  کی  اپیل کی جبکہ والد کا کہنا ہے کہ صلاح الدین بچپن سے ذہنی معذور تھا اور پولیس نے اے ٹی ایم سے کارڈ چرانےکے الزام میں گرفتارکیا تھا ۔

صلاح الدین کے والد نے درخواست میں کہا کہ ایس ایچ او محمود الحسن، ایس آئی شفاعت علی اور اے ایس آئی مطلوب حسین نے تفتیش کے دوران تشدد کرکے بیٹے کو قتل کیا اور گھر والوں کو اطلاع دیئے بغیر اس کا پوسٹ مارٹم کروا دیا۔

وزیرِاعلیٰ پنجاب کے ترجمان شہباز گل کے مطابق پولیس کی حراست میں دم توڑنے والے شخص صلاح الدین کے والد کی درخواست پر متعلقہ تھانے کے ایس ایچ او, اے ایس آئی اور تقتیشی افسر کے خلاف مقدمہ درج کر لیا گیا ہے۔

یہ مقدمہ تعزیراتِ پاکستان کی دفعہ 302 کے تحت درج کیا گیا ہے جو قتلِ عمد کے بارے میں ہے۔