امیر جماعت اسلامی پاکستان سینیٹر سراج الحق نے کہا ہے کہ پاکستانی عوام کے صبر کا پیمانہ لبریز ہو رہا ہے، کیونکہ 46 دنوں سے ہمارے 80 لاکھ کشمیری مسلمان اجتماعی قبر میں ہیں، اب حکمرانوں کے بیانات سےآگے بڑھ کرعملی اقدام اٹھا نا ہونگے۔

امیر جماعت اسلامی سینیٹر سراج الحق نے کشمیریوں سے اظہار یکجہتی کیلئے منعقدہ جلسہ سے خطاب میں کہا کہ کشمیر سے متعلق وزیراعظم عمران خان کے دو روز قبل دیے گئے بیان کو مسترد کرتے ہیں۔

سراج الحق نے کہا کہ وزیراعظم عمران خان کے ایل او سی کراس کرنے والوں کو دشمن قرار دینے کے  بیان سے امریکا اور مودی خوش ہوئے۔

سراج الحق نے یہ بھی کہا کہ کشمیر میں لاکھوں بچوں کو یتیم بنا دیا گیا، آج سرینگر میں آج ساتواں جمعہ تھا جو کہ ادا نہ کیا جا سکا کشمیری اپنے گھروں کے اندر قبریں کھود کراپنے بزرگوں کو دفنانے پر مجبور ہیں۔

امیر جماعت اسلامی کا کہنا تھا کہ وزیراعظم صاحب نے جلسے میں اعلان کیا ایل او سی کراس کرنے والا پاکستان کا غدار ہو گا، میں پوچھنا چاہتا ہوں اگر انڈیا نے آزاد کشمیر پر حملہ کیا تو پھر کاروائی کریں گے؟

سراج الحق کا یہ بھی کہنا تھا کہ 72 سالوں میں کتنے ممالک آزاد ہو گئے لیکن ایک کشمیر ہے جن کے ہاتھوں میں ابھی بھی زنجیریں ہیں ۔

امیر جماعت اسلامینے اپنے خطاب میں کہا کہ میں اقوام متحدہ سے پوچھنا چاہتا ہوں مشرقی تیمور، سوڈان آزاد ہو گیا لیکن کشمیری آج بھی مر رہے ہیں۔

سینیٹر سراج الحق پاکستان سینیٹر سراج الحق نے مزید کہا کہموجودہ حکومت کے پاس دو راستے ہیں ایک آگے بڑھ کر جنگ سرینیگر میں لڑنی ہے یا وہ اسلام آباد تک آ پہنچے پھر لڑنا ہے۔