پاکستان مسلم لیگ (ن) کےصدر اور قومی اسمبلی میں قائد حزب اختلاف شہباز شریف نے کوٹ لکھپت جیل میں پارٹی کے قائد نوازشریف سے ملاقات کی۔

پارٹی ذرائع کے مطابق اپوزیشن لیڈر نے سابق وزیراعظم کو مولانا فضل الرحمٰن سے گزشتہ روز ہونے والی ملاقات اور آئندہ ماہ کے آزادی مارچ سے متعلق گفتگو پر اعتماد میں لیا۔

 شہباز شریف، احسن اقبال اور خواجہ محمد آصف نے نواز شریف سے ڈیڑھ گھنٹے کی ملاقات کی، بعد ازاں اعظم نذیر تارڑ، امجد پرویز اور خواجہ حارث بھی ملاقات میں شامل ہوگئے۔

ملاقات میں نواز شریف کی 18ستمبر کی پیشی پر قانونی مشاورت کے ساتھ ملک کی سیاسی صورتحال پر بھی تبادلہ خیال کیا گیا۔

ذرائع کے مطابق شہباز شریف نے بڑے بھائی سے ملاقات سے قبل اپنے صاحبزادے حمزہ شہباز سے بھی جیل میں ملاقات کی

یاد رہے کہ گزشتہ روز شہباز شریف اور مولانا فضل الرحمان کے درمیان ملاقات میں دونوں جماعتوں کی جانب سے مشترکہ طور پر آزادی مارچ کی تاریخ طے کرنے پر اتفاق ہوا تھا۔

واضح  رہے کہ مولانا فضل الرحمان نے وفاقی حکومت کے خلاف اکتوبر میں آزادی مارچ کا اعلان کررکھا ہے جس کیلئے وہ سیاسی جماعتوں سے رابطے کررہے ہیں۔

 جبکہ پاکستان پیپلزپارٹی پہلے ہی مولانا فضل الرحمان کے اسلام آباد لاک ڈاؤن میں شرکت سے انکار کرچکی ہے۔