اسپیکر قومی اسمبلی نے مسلم لیگ نواز کے ممبر قومی اسمبلی شاہد خاقان عباسی کو جوابی خط لکھ دیا ہے۔

تفصیلات کے مطابق شاہد خاقان عباسی کو جوابی خط اسپیکر قومی اسمبلی اسد قیصر کی ہدایت پر لکھا گیا ہے۔

خط کا متن ہے کہ اسپیکر بحیثیت قومی اسمبلی کے کسٹودین اراکین کے حقوق کا تحفظ کرنے کے حوالے سے اپنی ذمہ داریوں سے بخوبی آگاہ ہیں جبکہ پروڈکشن آرڈرز کے معاملے پر اسپیکر غیر جانبدارانہ سوچ سے فیصلہ کرتے ہیں۔

خط میں لکھا گیا ہے کہ اسپیکر زیر حراست رکن کے خلاف درج شدہ کیس کی نوعیت کا بغور جائزہ لیتے ہیں اور پروڈکشن آرڈر کا اجراء اسپیکر کا صوابدیدی اختیار ہے رکن اس کا مطالبہ نہیں کر سکتا ہے۔

خط میں مزید لکھا گیا ہے کہ اسمبلی کے قواعد وضوابط کے مطابق اسپیکر ضروری سمجھنے پر زیر حراست رکن کو اجلاس میں شرکت کے لیے طلب کر سکتا ہے اور اگر زیر حراست رکن اسپیکر کی جانب سے پروڈکشن آرڈرز کے اجراء پر مطمئن نہیں تو اس سلسلہ میں عدالت سے رابطہ کرسکتا ہے۔

واضح رہے کہ اس سے قبل شاہدخاقان عباسی نےاسپیکر قومی اسمبلی اسد قیصرکوکھلاخط لکھا تھا جس میں انہوں نے

اسپیکراسمبلی اسد قیصرکوکہا ہےکہ پاکستان کی قومی اسمبلی کی بالادستی اورتقدس کی خاطرذمہ داری کےاحساس کے ساتھ یہ کھُلا خط آپ کے نام ارسال کررہا ہوں۔

سابق وزیراعظم کاخط میں اسپیکرکوکہنا تھا کہ نجی ملاقاتوں ، سرکاری گفتگو کےدوران اور ایوان کے اندرانفرادی اوراجتماعی طورپرمیں آپ کے دفتر پر زوردیتا آیا ہوں، اُن تمام ارکان قومی اسمبلی کے پروڈکشن آرڈرز جاری کرنے کی ضرورت ہے جو جیل یا کسی دیگر حراست میں ہیں۔ لیکن افسوس میری کوششوں کا کوئی اثر نہ ہوا۔