اے ٹی ایم کارڈ چوری کر کے سی سی ٹی وی کیمرہ میں منہ چڑانے والے ملزم صلاح الدین پر پنجاب پولیس کے تشدد کی ویڈیومنظرِعام پرآگئی۔

ویڈیو میں پولیس اہلکار اے ٹی ایم کارڈ چور صلاح الدین کے ہاتھ باندھ کر اسے تشدد کا نشانہ بنا رہے ہیں جبکہ ملزم صلاح الدین تشدد کے باعث چیخ و پکار کر رہا ہے۔

صلاح الدین پر پولیس تشدد کی ویڈیو سوشل میڈیا پر وائرل ہوگئے جسے اب تک ہزاروں لوگوں نے دیکھا اور تشدد کے اس واقعہ پر پولیس کو شدید تنقید کا نشانہ بنایا۔

واضح رہے کہ پولیس کی حراست میں مبینہ تشدد سے ہلاک ہونے والے ذہنی معذور شخص صلاح الدین کی ابتدائی پوسٹ مارٹم رپورٹ میں تشدد کی تصدیق ہوگئی تھی۔

رپورٹ کے مطابق جسم کے مختلف حصوں گردن، کہنی، دائیں گھٹنے، دائیں کندھے، ہاتھ اور دائیں ٹانگ پر تشدد کے نشانات پائے گئے تھے۔

یاد رہے کہ پاکستان کے صوبہ پنجاب کے ضلع رحیم یار خان میں صلاح الدین پرالزام تھا کہ وہ اے ٹی ایم سے کارڈ چراتا ہے، پولیس نے صلاح الدین کورحیم یار خان سے حراست میں لیا اور گرفتاری کے اگلے روزصلاح الدین جاں بحق ہوگیا تھا۔

صلاح الدین  کے بھائی نے وزیراعظم ،آرمی چیف ،اورچیف جسٹس سے انصاف  کی  اپیل کی جبکہ والد کا کہنا تھا کہ صلاح الدین بچپن سے ذہنی معذور تھا اور پولیس نے اے ٹی ایم سے کارڈ چرانےکے الزام میں گرفتارکیا تھا۔

صلاح الدین کے والد نے درخواست میں کہا  تھا کہ ایس ایچ او محمود الحسن، ایس آئی شفاعت علی اور اے ایس آئی مطلوب حسین نے تفتیش کے دوران تشدد کرکے بیٹے کو قتل کیا اور گھر والوں کو اطلاع دیئے بغیر اس کا پوسٹ مارٹم کروا دیا تھا۔