وفاقی وزیر مذہبی امور پیر نور الحق قادری کا کہنا ہے کہ پاکستان  سے ایران عراق   اور شام جانے والے زائرین کی سہولیات  کے لیےجامع پالیسی پر کام جاری ہے۔

وفاقی وزیر مذہبی امور پیر نور الحق قادری کی زیر صدارت ایران ،عراق  اور شام کی زیارات کے حوالے سے اہم اجلاس  ہوا ۔اجلاس میں شیعہ وفاق المدارس، علما ءاور دیگر منتظمین نے شرکت  کی۔

اس  موقع پر وفاقی وزیر مذہبی امور پیر نور الحق قادری کا کہنا تھا کہ آل رسول  صلی اللہ و علیہ و آلہ وسلم سے عقیدت رکھنے والے 6 لاکھ زائرین سالانہ زیارات پر جاتے ہیں۔

انہوں نے مزید کہا کہ حکومت زائرین کی سہولت کے لیےتمام اسٹیک ہولڈرز سے مشاورت کر رہی ہے۔فیری سروس اور خصوصی پروازوں کے اجرا ء کے لیے متعلقہ اداروں سے بات کی جائے گی ۔

پیر نور الحق قادری  کا کہنا تھا کہ تافتان بارڈر پر زائرین کو  بنیادی سہولیات کی فراہمی  کے لیےبلوچستان حکومت سے بات چیت جاری ہے۔

دوسری جانب  کوئٹہ کی ضلعی انتظامیہ نے یکم محرم الحرام سے دس محرم الحرام تک  زائرین کو سیکیورٹی دینے سے انکار  کردیا۔

ضلعی انتظامیہ کی جانب سےجاری نوٹیفیکیشن میں زائرین کو کوئٹہ سے تفتان بائی روڈ سفر سے اجتناب  کرنے کا مشورہ  دیا گیا۔