چیئرمین پی پی پی بلاول بھٹو زرداری نے کہا ہے کہ سلیکٹڈ وزیراعظم کی تقریر پر تعریف تو ہورہی ہے لیکن عمران خان کو اپنی پوری تقریر کشمیر پر کرنی چاہیے تھی۔

تفصیلات کے مطابق پی پی پی چیئرمین بلاول بھٹو زرداری نے سیہون شریف پر میڈیا سے گفتگو کرتے ہوئے کہا کہ مرحوم غلام شاہ جیلانی کی تعزیت کرنے آیا ہوں کیونکہ پیپلزپارٹی اپنے کارکنوں کو نہیں بھولتی۔

بلاول بھٹوزرداری کا کہنا تھا کہ پاکستانی عوام یہ توقع رکھتے ہیں کہ عمران خان کشمیر کو ذاتی مفادات کیلیے استعمال نہیں کریں گے ۔

بلاول بھٹو زرداری کا یہ بھی کہنا تھا کہ جو سمجھدار ہیں وہ اصل حقیقت جانتے ہیں لیکن پاکستان کی عوام میں اس وقت وہ جذبہ نہیں اور وہ مایوس ہیں۔

 انھوں نے کہا کشمیری بہن بھائیوں پر تاریخی حملہ ہوا ہے، بھارت نے کشمیر کو 55 دن سے جیل بنا رکھا ہے، وزیر اعظم کو انسانی حقوق کا مسئلہ اٹھانا چاہیے تھا۔

چیئرمین پی پی پی نے کہا کہ عمران خان نے جو جنرل اسمبلی میں تقریر کی وہ پہلے سے طے شدہ تھی ، سلیکٹیڈ حکومت کو اپنی پوری تقریر کشمیر پر کرنی چاہیے تھی۔

بلاول بھٹو زرداری نے یہ بھی کہا کہ خان صاحب کو کشمیر کی حق خود ارادیت سمیت اقوام متحدہ کے تمام چارٹر پر باتیں کرنا چاہیئے تھی، جب آپ کشمیر پر پورا موقف ہی نہیں اپنائیں گے تو دنیا سمجھے گی کے آپ نے سرینڈر کرلیا۔

چیئرمین پی پی پی کا کہنا تھا کہ عمران خان نے کشمیر پر چند باتیں ضرور کی ہیں اور وہاں جاکر تقریر کرنا مشکل نہیں پرانہوں نے صرف عوام اور کچھ سلیکٹڈ کو خوش کرنے کیلیے تقریر کی۔

چیئرمین پیپلز پارٹی بلاول بھٹوزرداری کا مزید کہنا تھا کہ ہم اپنی عوامی رابطہ مہم جاری رکھیں گے اور ہماری عوامی رابطہ مہم مزید آگے بڑھتی رہے گی جبکہ مولانا فضل الرحمان وہی مطالبہ کر رہے ہیں جو ہم کر رہے ہیں۔ میں پاکستان کے ہر شہر اور گاؤں میں جاؤں گا اور اب ہم مل کر نااہل اورنالائق حکومت کو گھر بھیجیں گے۔