آزاد کشمیر کے وزیراعظم راجہ فاروق حیدر خان نے کنٹرول لائن کے علاقے حویلی فاروڈ کہوٹہ کا دورہ کیا ہے۔

تفصیلات کے مطابق کنٹرول لائن کے علاقے حویلی فاروڈ کہوٹہ کے دورہ میں آزاد کشمیر کے وزیر اعظم کا کہنا تھا کہ کنٹرول لائن حویلی میں بسنے والے افراد کے حوصلے بلند ہیں۔

راجہ فاروق حیدر نے کہا کہ حویلی کے عوام سیسہ پلائی دیوار کی طرح دشمن کے سامنے سینہ سپر ہیں، کنٹرول لائن پر بسنے والے بہادر کشمیریوں کو سلام پیش کرتا ہوں کہ 44 روز کے کرفیو کے باوجود بھی بہادر کشمیریوں کے حوصلے بلند ہیں۔

انکا مزید کہنا تھا کہ مقبوضہ و آزاد کشمیر کی سرحدوں کو کشمیری جلد رونڈ ڈالیں گے۔

وزیر اعظم آزاد کشمیر راجہ فاروق حیدر نے کہا کہ کنٹرول لائن پر بسنے والے افراد کو ریلیف دیا جائے گا کیونکہ حویلی فاروڈ کہوٹہ تین اطراف سے بارڈر لائن میں گھرا ہوا ہے۔

واضح رہے کہ اس سے قبل ایل اوسی کے بھمبر سیکٹرکے دورے  پر راجہ فاروق حیدر نے بھارتی فائرنگ اور بمباری سے کنٹرول لائن پر بسنے والے شہریوں کی املاک کو ہونے والے نقصان کا جائزہ لیا اورانہیں ہرممکن  تعاون کا یقین دلایا۔

وزیراعظم آزاد کشمیر کا کہنا تھا کہ مودی خطے کو تباہی کی طرف لے جانا چاہتا ہے،ہمیں کشمیریوں کے خون کے ساتھ خون شامل کرنا ہو گا۔

  جلسے سے خطاب میں راجہ فاروق حیدرخان کا یہ بھی کہنا تھا کہ جنونی آر ایس ایس خون کی ہولی کھیل رہی ہے، مودی دوسرا ہٹلر ہے،اسکےعزائم انتہائی خطرناک ہیں، مودی خطہ کو تباہی کی طرف لے جانا چاہتا ہے۔