وزیر خارجہ شاہ محمود قریشی نے کہا ہے کہ بھارت کی پاکستانی فضائی حدود استعمال کرنے کی اجازت کیلئے درخواست مسترد کردی ہے۔

تفصیلات کے مطابق وزیر خارجہ مخدوم شاہ محمود قریشی نے اپنے ایک ویڈیو پیغام میں کہا کہ ہندوستان کی درخواست کہ ہندوستان کے وزیراعظم نریندرمودی بیس تاریخ کو جرمنی جانے اور اٹھائیس تاریخ کو واپس آنے کیلئے فضائی حدود استعمال کرنے کی اجازت طلب کی ہے۔

اپنے بیان میں شاہ محمود قریشی نے کہا کہ پاکستان نے مقبوضہ جموں وکشمیرکی صورتحال اور ہندوستان کے روئیے کو سامنے رکھتے ہوئے ہندوستان کو اجازت نہ دینے کا فیصلہ کیا ہے اور ہم نے انڈین ہائی کمشنرکو اس فیصلےسے آگاہ کر دیا ہے۔

واضح رہے اس سے قبل بھارت نے پاکستان سے فضائی حدود استعمال کرنے کی اجازت مانگی تھی۔

بھارتی حکومت نے وزیراعظم نریند رمودی کے جہاز کو پاکستان کی فضائی حدود سے گزرنے کے لئے باقاعدہ طور پر گزشتہ ہفتے پاکستان کو درخواست دی تھی ۔

درخواست میں موقف اپنا یا گیا تھا کہ بھارتی وزیراعظم نریندرمودی کا جہاز پاکستانی فضائی حدود استعمال کرکے امریکہ کے لئے اڑان بھرے گا، پاکستان فضائی حدود استعمال کرنے کی اجازت دے۔

درخواست میں مزید کہا گیا تھا کہ اسپیشل جہاز بیس ستمبر کو پاکستانی فضائی حدود سے گزر کر امریکہ جائے گا جہاں بھارتی وزیراعظم اقوام متحدہ کے اجلاس میں شرکت کریں گے۔

واضح رہے کہ اس سے پہلے پاکستان نے بھارتی صدر کے طیارے کو پاکستانی فضائی حدود کے استعمال  کی اجازت نہیں دی تھی  تاہم  سفارتی ذرائع کا کہنا ہے کہ پاکستان عالمی قوانین کے تحت اجازت دینے کا پابند ہے۔