وزیراعظم عمران خان سے تحریک انصاف کے رہنما بابراعوان کی ملاقات ہوئی جس میں ملکی موجودہ سیاسی صورت حال اور قانونی امور پر تبادلہ خیال کیا گیا۔

ملاقات میں احتساب کے جاری عمل اور حکومت کے اصلاحاتی ایجنڈے پر بھی غور کیا گیا۔

اس موقع پر وزیراعظم عمران خان کا کہنا تھا کہ احتساب کا عمل جاری رہے گا، کوئی سمجھوتہ نہیں کروں گا، بلیک میلنگ برداشت نہیں کریں گے۔

عمران خان کا یہ بھی کہنا تھا کہ احتساب کی راہ میں روڑے اٹکانے والوں کو مایوسی ہوگی، معاشی صورت حال میں بہتری کے لیے دن رات کام جاری ہے۔

وزیراعظم عمران خان نے کشمیر میں جاری مسلسل لاک ڈاون پر اظہار تشویش کرتے ہوئے کہا کہ کشمیریوں کے حقوق کے لیے سیاسی اور سفارت کاری کی کوششیں جاری رہیں گی۔

جبکہ ملاقات میں تحریک انصاف کے رہنما بابراعوان نے کہا کہ معاشی حالات کی بہتری کے لیے درست سمت کا تعین ہوچکا ہے، ملک کو پہلی بار ترقی کی راہ پر گامزن کیا جارہا ہے۔

بابراعوان نے یہ بھی کہا کہ ماضی میں حکمرانوں نے ملکی ترقی کے لیے سنجیدگی کا مظاہرہ کبھی نہیں کیا، 50 سال سے مسلط مافیا کے خلاف وزیراعظم نے تاریخی جدوجہد کی ہے۔

تحریک انصاف کے رہنما بابراعوان نے مزید کہا کہ احتساب اور شفافیت موجودہ حکومت کی اہم کامیابی ہے، غریب کا تحفظ اور عزت نفس کا خیال حکومتی ترجیح ہے، ریاست مدینہ کا ماڈل اپنانا بہترین طرز حکمرانی ہے۔

واضح رہے اس سے قبل وزیراعظم عمران خان نے معروف صنعتکاروں اور کاروباری شخصیات سے ملاقات کی۔

اس موقع پر وزیرِاعظم عمران خان کا کہنا تھا کہ موجودہ حکومت کاروباری برادری کو ہر ممکنہ سہولت فراہم کرنے کے لئے پرعزم ہے جبکہ نیب سے متعلق کاروباری برادری کے تحفظات کے حل کے لئے لائحہ عمل تشکیل دے دیا ہے، اس سلسلے میں کاروباری شخصیات پر مشتمل کمیٹی تشکیل دی جا رہی ہے تاکہ نیب اور کاروباری برادری سے متعلق معاملات کو احسن طریقے سے حل کیا جا سکے۔