وزیراعظم عمران خان سے کیوبا کے نائب صدر ڈاکٹر رابریٹو کی ملاقات ہوئی۔

ملاقات میں باہمی امور، دو طرفہ تعلقات پر تبادلہ کیا گیا جبکہ ملاقات میں مختلف شعبوں میں دو طرفہ تعلقات بڑھانے پر مشاورت بھی کی گئی۔

دونوں رہنماؤں نے ملاقات میں سیاسی،معاشی تعلقات استوار کرنے پراتفاق کیا۔

اس موقع پر وزیراعظم عمران خان نے کہا کہ پاکستان اور کیوبا کے تاریخی اور خوشگوار تعلقات ہیں اور پاکستانی عوام میں کیوبا کےسابق صدر فیڈل کاسترو کا کافی احترام پایا جاتا ہے۔

عمران خان کا کہنا تھا کہ کیوبا میں انسانی ترقی متاثر کن ہے،انسانی ترقی ،سماجی اور معاشی ترقی حکومت کے وژن کا حصہ ہے۔

وزیراعظم نے ملاقات میں مقبوضہ کشمیر میں بھارتی افواج کے مظالم سے آگاہ کرتے ہوئے کہا کہ مقبوضہ کشمیر میں بھارت انسانی حقوق کی سنگین خلاف ورزیاں کررہا ہے۔

وزیراعظم عمران خان کا مزید کہنا تھا کہ اقوام متحدہ کی قراردادوں کے مطابق مسئلہ کشمیر کا پرامن حل چاہتے ہیں، اس معاملے میں عالمی برادری معصوم مقبوضہ کشمیری عوام کی تحریک کا ساتھ دے۔

وفود کی سطح پر ملاقات میں وزیر خارجہ شاہ محمود قریشی اور دیگر ممبران بھی موجود تھے۔

واضح رہے اس سے قبل وزیراعظم عمران خان نے ترجمانوں اور پا رٹی رہنماؤں کا اہم اجلاس طلب کیا ،جس میں جمعیت علمائے اسلام ف کے آزادی مارچ اور سابق وزیراعظم نواز شریف کی صحت پر تبادلہ خیال ہوگا۔

ذرائع کے مطا بق عمران خان موجودہ صورتحال اور پارٹی کے اس سلسلے میں بیانیے پر ترجمانوں کو بریفنگ دیں گے، اجلاس میں ملک میں امن و امان سمیت دیگر سیاسی مسائل زیر بحث آئیں گے۔

وزیر اعظم کی زیر صدارت اجلاس میں آزادی مارچ سے نمٹنے پرمشاورت ہوگی، اجلاس میں تاجروں کی ہڑتال سے پیدا، صورتحال پر بھی بات ہوگی۔