چیئرمین نیب جسٹس ریٹائرڈ جاوید اقبال  نے کہا ہے کہ نیب کے دروازے  تمام افراد کیلئے کھلے ہیں۔

تفصیلات کے مطابق لاہور میں قومی احتساب بیورو کے چیئرمین جسٹس جاوید اقبال نے کنگ ایٖڈورڈ میڈیکل یونیورسٹی لاہور میں مہمان خصوصی کی حیثیت سے خطاب کرتے ہوئے کہا کہ دیمک توکچھ دوائیوں سے ٹھیک ہوسکتی ہے لیکن کرپشن ایک ایسا ناسور ہے جس نے ہمارے ملک کی جڑیں کھوکھلی کر دی ہیں، اب تو غالبا سرجری کے بغیر کرپشن کا خاتمہ ممکن نہیں ہےجس کے لیے معاشرے کے تمام طبقوں کو مل کر کام کرنا ہوگا۔

انہوں نے کہ نیب کی وجہ سے ملک کی معیشت میں ترقی نہ کرنے کے تاثرکویکسرمستردکرتے ہیں، یہ ایک محض الزام ہے اور نیب کے دروازے بزنس کمیونٹی اور بیوروکریسی سمیت تمام افراد کے لیے کھلے ہیں۔

جاوید اقبال کا کہنا تھا کہ تاجروں کی شکایات کے ازالہ کیلئے تمام ڈویژنز میں ڈائریکٹر کو تعینات کردیا گیا ہے جبکہ 4 ماہ اور 24 دن گزر جانے کے باوجود ایک بھی شکایت موصول نہیں ہوئی ہے۔

انہوں نے بتایا کہ حکومتیں آتی جاتی ہیں مگر نیب کی وفاداریاں صرف پاکستان کے ساتھ ہیں، آج ہم اربوں ڈالر کے مقروض ہیں، جو کہاں خرچ ہوئے یہ آج تک پتہ نہیں چل پایا ہے اور نیب جب یہ پوچھتی ہے کہ یہ اربوں روپیہ کہا خرچ ہوا تو اس میں کونسی غلط بات ہے۔

اس موقع پر چیئرمین نیب کا کہنا تھا کہ ہم پر الزام لگایا جا رہا ہے کہ کرپشن کی رقوم واپس کب لائی جائیں گی، ملک میں 70 سال سے کرپشن جاری ہے، ریکوری کیلئے کچھ وقت تو دیں تاکہ رقوم واپس لاسکیں۔