پیراگون اسکینڈل کیس میں گرفتار خواجہ سعد رفیق اور سلمان رفیق کے جوڈیشل ریمانڈ میں پانچ اکتوبر تک توسیع کردی گئی۔

تفصیلات کے مطابق لاہور کی احتساب عدالت میں پیراگون ہاؤسنگ اسکینڈل کیس کی سماعت میں خواجہ سعد رفیق اورخواجہ سلمان رفیق کوعدالت میں پیش کیا گیا، جج جواد الحسن نےکیس کی سماعت کی۔

عدالت نے دائرہ اختیار کے خلاف خواجہ برادران کی درخواست پر وکلاء کو مزید بحث کے لئے طلب کرلیا،دوران سماعت عدالت نے گزشتہ سماعت پر خواجہ برادرن کو پیش نہ کرنے پر ایس پی ہیڈ کوارٹر پر برہمی کا اظہار کرتے ہوئے کہا کہ ملزمان کو پیش کیوں نہیں کیا گیا ، جس پر ایس پی ہیڈکوارٹر نے بتایا کہ یہاں ہڑتال تھی، لاک ڈاون تھا۔

عدالت نے ریمارکس دیئے کہ عدالت کام کر رہی ہے تو لاک ڈاون کیسا، اگر حکومت اس کیس کو آگے نہیں چلانا چاہتی تو بتائے۔

عدالت نے کہا کہ جس کی جو مرضی آئے وہ آکر لکھ کر دے دیتا ہے،اگر کوئی یہ سمجھتا ہے کہ عدالت کا راستہ روکا جا سکتا ہے تو ایسا نہیں ہو گا، ملزموں کو عدالت پیش نہ کرنا عدالتی کاموں میں مداخلت کے مترادف ہے،اس معاملے کی مکمل تفتیش ہو گی۔

ان ریمارکس کے بعد عدالت نے آئندہ سماعت پر فریقین کو فرد جرم ختم کرنے اور بریت کی درخواستوں پر بحث مکمل کرنے کی ہدایت کر دی۔

واضح رہے کہ خواجہ برادران پیراگون ہاؤسنگ اسکینڈل میں گرفتار ہیں، نیب کے مطابق وفاقی وزیر ہوتے ہوئے خواجہ سعد رفیق نے اپنے اختیارات کا غلط استعمال کیا تھا اور شواہد کو ٹمپر کرنے کی کوشش بھی کی، دونوں بھائیوں نے اپنے ساتھیوں سے مل کر عوام کو دھوکہ دیا اور رقم بٹوری۔

نیب کا کہنا ہے کہ خواجہ برادران پیراگون ہاؤسنگ سوسائٹی سے فوائد حاصل کرتے رہے، خواجہ برادران کے نام پیراگون میں 40 کنال اراضی موجود ہے۔

نیب کی تفتیشی رپو رٹ کے مطابق خواجہ سلمان اور ندیم ضیا کے بیٹوں کے نام پر 2 ارب 96 کروڑ کی رقم جاری ہوئی، سعد رفیق کے اکاؤنٹس میں 8 سال کے دوران 46 کروڑ 60 لاکھ منتقل ہوئے۔