وزیراعظم عمران خان کی چین میں نیشنل پیپلز کانگریس کے چیئرمین لی ژان شو سے ملاقات ہوئی ، جس میں دونوں رہنماؤں نے دو طرفہ دورے جاری رکھنے پر اتفاق کیا۔

ملاقات میں وزیراعظم عمران خان کے ہمراہ وزیر خارجہ شاہ محمود قریشی، وزیر ریلوے، معاون خصوصی انرجی اور سینئر حکام نے شرکت کی۔

اس موقع پروزیراعظم عمران خان نے چند دہائیوں میں چینی معیشیت میں بہتری کی تعریف کی اور چیئرمین لی ژان شو کو چین کی 70 ویں سالگرہ پرمبارک باد بھی دی۔

وزیراعظم نے لی ژان شو سے ملاقات میں زرعی سمیت دیگر شعبوں میں بہتری کے لیے چینی تعاون کی درخواست کی اور قومی ایشوز پر سپورٹ کرنے پر چین کا شکریہ ادا بھی کیا۔

وزیراعظم کا کہنا تھا کہ پاکستان اور چین قریبی دوست پارٹنراور برادر ملک ہیں، چینی کمپنیاں پاکستان میں صنعتکاری سے فائدہ اٹھا سکتی ہیں۔

عمران خان کا یہ بھی کہنا تھا کہ پاکستان بھی غربت کے خاتمے کے لئے چینی تجربے سے استفادہ کرنا چاہتا ہے اس لئے چینی ماڈل کو اپناتے ہوئے پاکستان سے غربت کا خاتمہ کریں گے۔

عمران خان نے کہا کہ سی پیک کی بروقت تکمیل پاکستانی حکومت کی اولین ترجیح ہے، سی پیک کا دوسرا فیز مکمل ہونے سے پاکستانی عوام کو روزگار کے مواقع دستیاب ہوں گے۔

وزیراعظم عمران خان نے مزید کہا کہ بھارتی 5 اگست کے غیر قانونی اقدام سے مقبوضہ کشمیر میں انسانی المیہ پیدا ہوا، مقبوضہ کشمیر کے لوگوں کو بنیادی حقوق فراہم کیے جائیں اور 2 ماہ سے زائد کرفیو کو بھی فوری ہٹایا جائے۔

چیئرمین این پی سی لی ژان شو نے عمران خان سے ملاقات میں پاکستانی قومی اہمیت کے حامل ایشوز پر چینی تعاون جاری رکھنے کے عزم کا اعادہ کیا۔

چیئرمین این پی سی کا کہنا تھا کہ پاکستان اور چین سی پیک کے ذریعے نئے منصوبے شروع کرسکتے ہیں۔

نیشنل پیپلز کانگریس کے چیئرمین لی ژان شو کا مزید کہنا تھا کہ وزیراعظم عمران خان کی جانب سے اٹھائے اقدامات کی چین حمایت جاری رکھے گا۔