کراچی کے علاقے گلشن اقبال موچی موڑ میں لوٹ مار کے دوران مزاحمت پر فائرنگ کر کے یونیورسٹی کی طالبہ کو قتل کر دیا گیا۔

پولیس کا کہنا ہے کہ مصباح اپنے والد کے ساتھ موچی موڑ کے قریب یونیورسٹی کی بس کا انتطار کر رہی تھیں کہ اچانک موٹر سائیکل پر سوار دو ملزمان نے لوٹ مار کی کوشش کی اور مزاحمت کرنے پر فائرنگ کر کے فرار ہو گئے۔

پولیس نے بتایا کہ ملزمان کی فائرنگ سے ایک لڑکی زخمی ہوئی جس کے بعد اسے فوری طور پر اسپتال منتقل کیا گیا لیکن وہ زخموں کی تاب نہ لاتے ہوئے جاں بحق ہو گئی۔

پولیس کے مطابق جاں بحق ہونے والی لڑکی کی شناخت 22 سالہ مصباح کے نام سے ہوئی جو ہمدرد یونیورسٹی کی طالبہ تھی۔

پولیس کا کہنا ہے کہ ابتدائی تحقیقات کے مطابق واقعہ ڈکیتی مزاحمت کا نتیجہ ہے قتل کی واردات میں ملوث دو ملزمان موٹرسائیکل پر سوار تھے ،ڈکیتی کے دوران ایک ملزم نے فائرنگ کی ۔

پولیس کا مزید کہنا ہے کہ مقتول مصباح کو سر پر ایک گولی لگی تھی اور اسکو زخمی حالت میں قریبی نجی اسپتال منتقل کیا گیا تاہم  زخمی لڑکی دوران علاج دم توڑ گئی ۔

گلشن اقبال میں یونیورسٹی کی طالبہ کا دوران ڈکیتی مزاحمت پر فائرنگ سے جاں بحق ہونی کے واقعہ پر آئی جی سندھ ڈاکٹرسیدکلیم امام نے سخت نوٹس لیتے ہوئے ایس ایس پی ایسٹ سے تفصیلی رپورٹ اور پولیس کے جملہ اقدامات کی تفصیلات فی الفور طلب کرلی ہیں۔

انہوں نے ہدایات جاری کیں کہ کرائم سین سے اکٹھا شواہد اور موقع معائنہ پر لیئے گئے بیانات کی روشنی میں تفتیش کو مؤثر اور مربوط بناتے ہوئے ملزمان کی جلد سے جلد گرفتاری کو یقینی بنایا جائے۔