وزیر خارجہ شاہ محمود قریشی نے کہا ہے کہ بھارت پاکستان کو بلیک لسٹ کی جانب دھکیلنا چاہتا ہے۔

تفصیلات کے مطابق وزیر خارجہ شاہ محمود قریشی نے برطانوی نشریاتی ادارے سے گفتگو کرتے ہوئے کہا کہ بھارت ایف اے ٹی ایف میں پاکستان کی مخالفت کررہا ہے، پاکستان نے ایف اے ٹی ایف کی ہدایات پر عمل کے لیے کوششیں کیں۔

برطانوی نشریاتی ادارے سے بات کرتے ہوئے وزیرخارجہ نے کہا کہ دنیا اس سب سے واقف ہے اور بینکاک میں ایشیا پیسیفک گروپ کےاجلاس میں بھی اس بات کا جائزہ لیا گیا ہے۔

شاہ محمود قریشی نے کہا کہ امید ہے آئندہ اجلاس میں پاکستان ایف اے ٹی ایف کو مطمئن کرلے گا، ایشیا پیسیفک گروپ میں بھی بھارتی رویے کا جائزہ لیا گیا۔

وزیر خارجہ کے مطابق ایشیا پیسیفک گروپ کو پاکستان کی پیش رفت پر اطمینان ہے، عمران خان ٹرمپ ملاقات میں بھی ایف اے ٹی ایف پر تعاون مانگا گیا تھا۔

انہوں نے کہا کہ امید ہے ایف اے ٹی ایف پاکستان کے نکتہ نظر کو سمجھے گا، ہمارے اقدامات پر سمجھتا ہوں امریکا کو پاکستان کی معاونت کرنی چاہئے۔

واضح رہے کہ اس سے قبل وزیر خارجہ شاہ محمود قریشی نے ملتان میں تقریب کے بعد میڈیا سے گفتگو کرتے ہوئے کہا تھا کہ چین سے ہمارے گہرے روابط ہیں،ہم مختلف ایشوز پر چین سے کورڈینینشن میں رہتے ہیں۔

شاہ محمود قریشی کا کہنا تھا کہ وزیر اعظم کے دورہ چین میں معیشت ،اقتصادیات اور کشمیر کا مسئلہ زیر بحث آئے گا۔

شاہ محمود قریشی کا مولانا فضل الرحمان پر تنقید کرتے ہوئے کہنا تھا کہ لانگ مارچ کا وقت اور تاریخ غلط ہے کیونکہ 27 اکتوبر کا دن یوم سیاہ کا دن منایا جاتا ہے اس دن بھارت نے کشمیر پر یلغار کی تھی اسلئے 27 اکتوبر پر کشمیریوں کے جزبات مجروع ہو ں گے۔